Jaha ri nyamalala

Hi Pilot Manganyi

 Maphorisa ya xitichi xa doroba ra ka Malamulele ehansi ka masipala wa Collins Chabane va hlotana na jaha ra malembe ya makume-mbirhi hi vukhale. Leswi swi ta endzhaku ka loko ku tivisiwile maphorisa ya xitichi xa ka Malamulele hi ku nyamalala ka yena hi siku ra 08, Nyenyankulu 2026. Jaha leri ri tiveka hi mavito ya Ntsako Baikaho Belebesi, wo huma exifundzenikulu xa Gauteng, kambe loko a  nyamalala a tshama emugangeni wa le Jerome na kokwani wa yena.

Ku ya hi xiviko xa maphorisa, Belebesi u hetelerile ku voniwa emugangeni wa le Jerome laha a tshama kona na kokwani wa yena wa malembe ya 68. Un’wana wa le rixakeni u boxile leswaku, loko Belebesi a nga se nyamalala u boxile leswaku u lava ku paka swiambalo swa yena a ya tshama ekhwatini. Endzhaku ka sweswo, va ringetile ku n’wi khumbha eka riqingo ra yena ra le nyongeni, kambe a nga kumeki. Leswi swi vangile ku khumbheka hi mayelana na mahlayisekelo ya yena. Maphorisa va ringetile ku hlotana na Belebesi hi tindlela hinkwato kambe a ku na nhlanga leyi balekeke ngati.

Xivangelo lexi hlohleteleke Belebesi ku va a teka xiboho lexi a xi tiveki. Hikokwalaho, maphorisa ya xitichi xa ka Malamulele va kombela ku pfuniwa hi ku hlotana na jaha leri. Tanihi masungulo ya n’hweti ya Dzivamisoko, a swi tiveki leswaku Belebesi u le kwihi, na swona ku hlotana na yena swi ya emahlweni. Maphorisa va kombela leswaku un’wana na un’wana loyi a nga na vuxokoxoko byo karhi lebyi fambelanaka na Belebesi a ti vonakarisa, hambi byi ri lebyintsongo. Va boxa leswaku hambi ku nga ri vuxokoxoko byo huma eka vanhu va ka Malamulele hambi ku ri Gauteng hikuva vuxokoxoko byi nga pfuna ku kuma laha jaha leri ri nga helela kona.

Un’wana na un’wana loyi a nga na vuxokoxoko byo karhi u hlohloteriwa ku va a khumbha muofisiri wa vulavisisi, Sejeni Tintswalo Miyambo eka 082 319 9724, kumbe muyimeri wa vuhlorhi Lieutenant Colonel Fhumulani Ragimana eka 082 729 0229. Kumbe ku khumbha riqingo ra ku mangala milandzu eka nomboro ya 08600 10111, eka xitichi xa le kusuhi. Maphorisa va kombela leswaku loko vanhu va nyamaleriwile hi un’wana wa vona va hatla va tivisa xitichi xa maphorisa xa le kusuhi ka ha ri na nkarhi.