Nghozi yi koxa vutomi

Hi Pilot Manganyi

Nghozi yo chavisa egondzweni ra N1 ekusuhi na Lunds, ehandle ka Polokwane yi koxile vutomi bya vanhu va ntlhanu va ku huma emugangeni wa ka Shikundu. Nghozi yi humelerile hi nkarhi wa awara ya mbirhi ni ndzhengha hi Ravumune, ra ti 02, Dzivamisoko 2026. Mhangu leyi a yi katsa movha wa BMW na Toyota Fortuner SUV.

Swiviko kusuka eka Ndzawulo ya Vutleketli na Vuhlayiseki bya Vaaki ya Limpopo, swi boxile leswaku muchayeri wa BMW u lahlekeriwile hi vulawuri laha a nga va a tlumbana na Toyota. Vachayeri hinkwavo a ku ri vavanuna va malembe ya kwalomu ka 40 na 50.

Ku ya hi un’wana wa muaki wa ka Shikundu, lava mune va loveke i vanhu va muti wun’we laha a va vuya ekaya ku va xiphemu xa nkhuvo wa mucato. Kambe wansati loyi wa vuntlhanu i wa le handle, na swona a lo kombela ku vuya na vona ekaya. “Swa vava hikuva a va vuyela mucato, na n’wana a nga tsakelanga ku vuya kambe a boheka”, ku boxa muaki wa ka Shikundu. Hambiswiritano, muchayeri wa movha ya Fortuner u vile a pona laha a nga va a vaviseka kunene laha a nga tsutsumiseriwa exibedlele ku kuma vutshunguri bya xihatla.

Holobye Phophi Ramathuba u vile a endzela xivandla xa nghozi laha a nga boxa leswaku i khombo swinene. U tlherile a kombela vachayeri leswaku va chayela hi vukheta, ngopfungopfu hi mikarhi yo wisa yo tanihi Paseka. “Un’wana na un’wana u jaherile ku fika laha a ya ka kona, kambe ku chayela hi mahadu swi vanga tinghozi to tanihi leti”, ku boxa Holobye Ramathuba.

Endzhaku ka swewo, gondzo ra N1 ri vile ri pfariwa eka timheho hinkwato hikokwalaho ka nghozi leyi. Vachayeri va vile va komberiwa ku va va tirhisa gondzo ra R101 ku kota ku fika laha va kongomeke kona loko va xilamulela mhangu va ha langutana na nghozi. Loko va hetile mitirho ya vona, gondzo ri vile ri pfuriwa. Hambiswiritano, vulavisisi bya xivangelo xa nghozi leyi byi ya emahlweni. Va xinawu va kombela leswaku vachayeri va chayela hi vukheta ku hlayisa vutomi bya vona, vachayeri van’wana na vakhandziyi.