NKOWANKOWA CONTINENTAL YI HUMA EKA XIYIMO XA XIHLOKA
Hi Themba Chauke
Xipano xa Nkowankowa Continetal xi huma eka xiyimo xa xihloka endzhaku ka ku hlula xipano xa Tshakhuma Tsha Madzivhandila, ku kuma mikutlunya yinharhu ya nkoka kusuka etshakwini ra tafula ra ligi. Sweswi xipano xi na mikutlunya ya 10 kusuka eka mitlangu ya 17, ku ringana na xipano xa Lebash Academy, kambe va rhanga hi ku hambana hi tigolo.
Leswi swi endla leswaku va huma etshakwini ra logo, loko Labash yi mbombomela. Ku cinca loku ku kombisa mhaka yo hlamarisa endzhaku ka loko xipano xi tshamile eka xiyimo xa xihloka nkarhi wo leha, endzhaku ka loko swi tekile mavhiki mo hlaya xipano xi nga si hlula na ntlangu na wun’we.
Xipano xi tikeriwile swinene eka nguva leyi, laha vatlangi va le ndzhaku a va nga hlangani kahle, loko vatlangi va le mahlweni va tsandzeka ku tirhisa mikateko yo howisa tigolo leswi endleke lswaku va tshama etshakwini ra logo. Hambiswiritano, ku hlula loku veke kona ehenhla ka xipano xa TTM, swi tisile ntshembho tanihileswi va lwelaka ku tshama eka logo eka nguva leyi taka.
Leswi a ku ri ku hlula ka vona ka vumbirhi hi ku landzelana, ehansi ka mudzaberi lontshwa, Timmy Mashele, loyi se a tekeke matomu tanihi mudzaberi wa xipano, loyi a ngheneke eka xipano emasungulweni tanihi xirho xa xipano xa xithekiniki eka xipano lexi. Ku fika ka yena se swi tisile ntshamiseko na ku titshembha eka xipano, vatlangi va le ku kombiseni ku antswa, va tikhoma kahle, na ku tiyimisela endzeni ka rivala.
Mashele i mudzaberi loyi a kaleke a pfuna xipano xa Phalaborwa United ku tlakusiwa ku nghena eka ABC Motsepe, kambe ehandle ka ku tlakusa xipano, xipano xi hambanile na yena emasungulweni ya nguva, xiboho lexi hlamariseke valandzeri vo tala va bolo ya milenge. Ntokoto wakwe na matimu ma yena swi tikomba se swi vonakala na le ka xipano xakwe lexintshwa, tanihileswi a tikombaka a ta aka xipano leswaku xi fikelela mbuyelo wo antswa.
Kusukela loko a ta va a tekile matomu, Mashele u nghenisile maendlelo lamantshwa loko swi ta eka vutiolori na loko ku lulamisiwa ntlangu, leswi swi vonakalaka eka matirhelo ma xipano. Vatlangi va tikomba va tekile maendlelo ma yena hi xihatla, na swona ku hlula hi ku landzelelana swi kombisa leswaku xipano xi nga ha cinca matafula ehansi ka vurhangeri bya yena.
Ntlangu lowu landzelaka wu ta va kona hi siku ra 11 Dzivamusoko loko va ta tlanga na Baduzah Celtics yo huma ePhalaborwa. Kasi va ta va va tlangela ekaya, na swona xipano xa Baduzah xi ta va xi nga ri na ntshikelelo wo lava ku hlula, xipano xi le ka xiyimo xa kahle ku hlula eka ntlangu lowu. Leswi va faneleke ku swi endla sweswi i ku kuma mikutlunya hinkwayo ku tikuma va ha ri eka ligi leyi, swo tala va ta swi vona eka nguva leyi taka.
Kasi eka yin’wana mitlangu, Mpheni Home Defenders yi caputile Tzaneen United 7-1 ku tiyisisa xiyimo xa yona xa le mahlweni. Mukondeni Young Chiefs yi hluriwile 2-1 hi Dolphins, loko Lebash Academy yi hluriwa 1-0 hi Vondwe XI Bullets.
Kun’wana, Musina United 2-2 Selwana White Vultures, loko Phalaborwa United yi tlangile ku ringana hi tandza-tandza na Baduzah Celtics.