A hi Xiximeni Ndzhaka ya Mandela!

Hi Themba Chauke

Holobyenkulu wa xifundzhankulu xa Limpopo Dokodela Phophi Ramathuba u kombela vaaki hinkwavo ku tekela enhlokweni n’hweti ya Mawuwani tanihi n’hweti ya khale ka puresidende wa tiko ra Afrika-Dzonga, Mufi Nelson Mandela – nkarhi wo tekela enhlokweni ku hoxa xandla ka Mandela na ku landzelela mikondzo ya yena hi swendlo swo korhokela na ku tlakusa miganga.

““Nelson Mandela u nyikerile hi vutomi bya yena eka ku kondletela ndzingano, vululami na Kurhula. Ku tinyiketela ka yena loku nga tsekatsekiki eka tifanelo ta ximunhu, nhluvukiso wa vaaki na vululami bya Vaaki ka ha ri rivoningo ra xongotelo wa hina hinkwerhu,” ku vula Holobyenkulu loyi a kombiseke leswaku loko ka ha tlangeriwa n’hweti ya Mandela, hi tsundzuxiwa hi ripfumelo rakwe ra leswaku un’wana na un’wana wa hina u na matimba yo tisa ku cinca emigangeni ya hina swi nga ri na mhaka eka ku kula ka swendlo swa hina.

Holobyenkulu Dok Ramathuba u tshikelerile leswaku n’hweti leyi yi tirha tanihi nkateko wa nkoka wo endla leswinene leswaku van’wana va vuyeriwa. Ku nga va hi ku tirha hi ku tinyiketela ehandle ko hakeriwa eka mihlangano yo pfuna vaaki, ku pfuna lava va nga le ka xiyimo xo tika, kumbe ku nghenelela eka migingiriko yo basisa miganga, vaaki va hlohloteriwa ku tinghenelerisa hi swendlo leswi vonakalaka leswi kondletelaka vun’we na ku aka rixaka leri tiyeke.

“Madiba u hi dyondzisile leswaku ‘a hi kuva hi hanya ntsena. I ku hambana loku hi ku endleke eka vutomi bya van’wana leswi swi nga ta kombisa nkoka wa vutomi lebyi hi byi hanyeke’. Hi moya wakwe, a hi khomaneni hi va nyandza yin’we ku xixima ndzhaka ya yena hi ku kombisa ntwelavusiwana na ku tisa ku hambana loku khomekaka eka vutomi bya vanhu lava va nga le kusuhi na hina” Holobyenkulu Ramathuba u ya emahlweni.

Holobyenkulu u komberile vanhu hinkwavo ku amukela nkoka wa vun’we, nhlonipho xikan’we na ntwelavusiwana leswi kondleteriweke hi Mandela xikan’we na ku tirhisana ku aka vumundzuku bya kahle bya xifundzhankulu.
“Loko ha-ha tsundzuka vutomi na ndzhaka ya Nelson Mandela hi n’hweti ya Mawuwani, hi fanele ku tintlhotlha ku hoxa xandla eka ku aka Limpopo leyi nga na ndzingano,” ku gimeta Holobyenkulu Dok Ramathuba.