Bodo ya RAF yi N’OKISIWA

Hi Themba Chauke

Holobye wa Vutleketli, Barabara Creecy U n’okisile bodo ya vufambisi bya nkwama wa tinghozi ta le magondzweni (RAF). Leswi swi landzela mitlhotlho ya mafambiselo lawa ya tsan’waka mafambiselo ya RAF eka migingiriko ya yona.

Mitlhotlho leyi vilerisaka holobye hi ku landzelerisa vulavisis yi katsa; Maendlelo yo lulamisa mafambiselo ya RAF, lawa ya koxaka timali to hlaya, leswi swi tikiselaka xikimu lexi; Ku yimisiwa ka mufambisinkulu wa RAF, leswi ku vuriwaka leswaku i maendlelo ya vusompfa, tanihileswi swi ntlhotlhiweke hi xinawu; Ku tshamela ro tsandzeka ku fikelela vuahluri ehenhla ka RAF, leswi engetelaka vutihlamuleri bya RAF swi tlhela swi tshikelela xiyimo xa swa timali eka xikimu lexi; Ku avana lokunkulu endzeni ka bodo, leswi swi endlaka leswaku swiboho swin’wana na swin’wana swi tekiwa hi ku hlawula, ku nga ri hi ku twanana, leswi swi kombisaka leswaku bodo yi pfumala vun’we eka ku teka swiboho swa nkoka; Ku tsandzeka ka bodo ku pfala swivandla swimbirhi swa vafambisi, leswi swi nga na nkoka eka mafambiselo ya xikimu, leswi swi katsaka Mufambisi wa timhaka ta swikoxo na nhloko ya Xinawu.

Hikokwalaho ka leswi swi paluxiweke, holobye u vurile leswaku u boheka ku tirhisa matimba ya yena ku teka swiboho leswi nga ta nghenelela eka mafambiselo ya xikimu. Holobye Creesy u vurile leswaku ndzawulo yi tinyiketerile ku ya emahlweni yi kuma tindlela leti ti lavekaka ku vuyisela ntshamiseko na ku tirha hi ku hetiseka ka xikimu, leswaku vatwisiwakuvava va ta fikelela vukorhokeri eka xikimu lexi.   U yile emahlweni a tiyisisa leswaku ndzawulo ya yena yi tiyimiserile ku hetisisa nawu wa xikimu xa tinghozi ta le magondzweni, leswi swi nga ta endla sisitimu leyi nga hoxisiki ku olovisela vakoxi ku fikelela swikoxo swa vona ehandle ka tihakelo ta xinawu.