Timovha ta Polo ti Susiwa ePatwini

Hi Themba Chauke

Va National Consumer Commission (NCC) va tivisa vatirhisi lava khumbhekaka hi ku susiwa epatwini timovha ta 253 ta Volkswagen Polo Sedan, leti endliweke kusukela hi ti 11 Mhawuri 2022, ku fika sweswi tanihileswi swi tivisiweke hi muphakeri. Va Volkswagen South Africa (VWSA) va tivisile va NCC hi ta ku susiwa ka timovha leti epatwini hikokwalaho ka mabandi ya vuhlayiseke ya muchayeri na mukhandziyi lawa ya nga nghenisiwangiki kahle. Kasi hi siku ra ti 17 Mawuwani 2025, NCC yi tivisile hi ta ku susiwa epatwini ka timovha ta 18 hi swiphiqo leswi fanaka, kasi sweswi va NCC va kumile xitiviso xa leswaku ku fanele ku tlhela ku susiwa 253 wa timovha.

Ku ya hi muphakeri, ku susiwa ka timovha leti epatwini swi kona hikokwalaho ka bandi ra vuhlayiseki leri nga na xihoxo, naswona mabandi hinkwawo ya vuhlayiseki ya le xineneni na le ximatsini, endzhaku na le mahlweni ya fanele ku kamberiwa. Hikokwalaho ka swihoxo leswi. Matirhelo ya bandi leri ya nga ha kayivela ku tirha loko ku humelela nghozi. Leswi swi nga endlaka leswaku ku va na ku vaviseka swinene eka muchayeri xikan’we na mafu. Vatirhisi va komberiwa ku tihlanganisa na vaxavisi va timovha ta VW lava va pasisiweke eAfrika-Dzonga ku kambela, na ku lunghisa mabandi lama kumbhekaka loko swi fanerile.

Ku tiyisisiwa ka ku susiwa ka timhovha leti epatwini swi ta koteka ntsena loko vinyi va timovha leti va teka goza eka mhaka leyi. Muvulavuleri wa NCC Pheto Ntaba u tsundzuxa vatirhisi ku angula eka ku susiwa ka timhovha epatwini hi xihatla. “NCC yi ya emahlweni yi landzelela ku susiwa ka timovha epatiwini loku ku ya ka emahlweni,” ku gimeta Ntaba.