Vandla ri Lerisa Masipala ku Lwisa Vukungundzwani

Themba Chauke

Vandla ra EFF eGiyani, ri machile ku ya etihofisini ta masipala wa Giyani laha va rhumeleke papilla ra swivilelo, va koxa swilo swo hambana-hambana. Swin’wana swa kona swi katsa ku ala ka masipala ku teka magoza ehenhla ka vatirhi va masipala lava va hehliwaka hi vukungundzwani

Ku ya hi vandla, mhaka leyi yi va kona endzhaku ka ntirho wo xavisa tinhundzu ta masipala lowu wu veke kona emasunguleni ya lembe, laha tinhundzu ta nkombo ta masipala leti ti nga xavisiwa ehandle ka mpfumelelo wa huvo ya masipala. Endzhaku ka mhangu leyi, ku vile ni vulavisis, naswona ku ya hi EFF, xiviko xa vulavisisi xi vula leswaku lava va endleke mhaka leyi va fanele ku byara vutihlamuleri.

Ximoko-nkulu xa EFF Eka xifundzhankulu xa Mopani, Austin Mabasa, u vurile leswaku masipala wu tsandzekile ku teka goza ra nkoka eka swibumabumelo swa xiviko. “Leswi swi humeleleke hi leswaku emasunguleni ya lembe, masipala wu khomile ntirho wo xavisa switirhi swa masipala, laha tinhundzu ta nkombo ti nga xavisiwa ehanhdle ka mpfumelelo wa huvo ya masipala. Laha vulavisisi byi nga endliwa naswona xiviko xi bumabumerile leswaku lava va endleke mhaka leyi va fanele ku teka vutihlamuleri eka mhaka leyi,” ku hlamusela Mabasa.

 “Hambiswiritano, masipala a wu swi lavi ku teka goza. Ha swi twisisa leswaku Mufambisi wa Swa Timali ta masipala u yimisiwile, kambe ka ha ri na swio swo hlaya eka mhaka leyi. Hikokwalaho hi lava leswaku masipala wu humesa xiviko xa vulavisisi leswaku un’wana na un’wana a xi vona leswaku hinkwavo lava va khumbhekaka eka mhaka leyi va ta hlamula,” u ya emahlweni.

Ku ya emahlweni eka swin’wana swa swikoxo swa vandla, va komberile masipala ku tekela enhlokweni vanhu lava ku nga khale va xavisa eka ndhawu leyi ku akiwaka timakete, xikan’we na ku hakela ndziho eka vaxavisi lava a va xavisa endhawini liya lava ku nga wisiwa timakete ta vona ku nga se akiwa timakete hi masipala. Mabasa u kombisile leswaku vandla ri nyikile masipala masiku ya 14 ku angula eka mhaka leyi

Mukhaselara Thamsanqa Mabunda u amukerile papilla leri ra swivilelo hi ku yimela meyara wa masipala wa Giyani Thandi Zitha, laha a nga tshembhisa ku hundzisa papilla leri ku ri yisa lomu ku faneleke leswaku va ta angula.