MASIPALA WU TA WISA SWIMAWUSA

Hi Themba Chauke

Miako yo ka yi nga ri enawini exivindzini xa doroba ra Giyani yi le milon’weni nakambe endzhaku ka swivilelo swa leswaku yi hlongola vavekisi na ku tekela ehansi nhluvuko wa ikhonomi edorobeni.

Leswi swi vonakarile hi nkarhi wa nhlengeletano ya Komiti ya Tiakhawunti ta Vaaki eka Masipala (MPAC) na vaaki, laha mufambisi wa masipala Vusi Duncan Khoza, a vutisiweke hi ku tsandzeka ka masipala ku teka goza eka xiboho xa huvo ya masipala xo bindzimuxa miako yo ka yi nga ri enawini exivindzini xa doroba ra Giyani.

Xirho xa MPAC, Shalati Maswanganyi u vule leswaku ku ya emahlweni ka miako yo ka yi nga ri enawini exivindzini xa doroba ra Giyani, laha ku nga na mabindzu swi sivelela masipala nkateko wa vuvekisi. “Hi le ku lahlekeriweni swinene hi vuvekisi hikwalaho ka miako yo ka yi nga ri enawini,” ku vula Maswanganyi, a nga se vutisa leswaku hikokwalaho ka yini masipala wu nga teki goza ra huvo ya masipala ro wisa miako leyi, na makungu ya masipala yo kuma xileriso xa khoto ku ya emahlweni no wisa miako leyi.

Loko a angula, Khoza u vule leswaku ku hlwela ku kona hikwalaho ka ku kambisisa swinawana swa mafambiselo ya masipala swo susa miako yo ka yi nga ri enawini. U vule leswaku swinawana swa masipala swi ta tirha tanihi xiseketelo xa masipala loko wu endla xikombelo xo wisa miako ekhoto. Khoza u yile emahlweni a vula leswaku masipala wu ta ya emahlweni wu lava xileriso xa le khoto ntsena loko wu kambisisile swinawana swa masipala hi mhaka leyi. “Hi fanele ku tiyisisa leswaku swinawana leswi swa fambelana na vumbiwa ra tiko ra Afrika-Dzonga,” ku vula yena.

Kasi na mhaka ya miako ya mabindzu lamantsongo na yona yi vutisiwile hi Maswanganyi, loyi a laveke ku basisiwa eka matirhelo ya masipala yo phakela timakete leti ta ha ku akiwaka, xikan’we na ku honisiwa ka timakete leti ku nga khale ti akiwile ku ti hlayisa.

Khoza u vule leswaku ku phakeriwa ka timakete leti ta ha ku akiwaka swi ta endliwa endzhaku ko endla swikombelo, kambe ku ta rhangisiwa emahlweni vanhu lava a va tirhela endhawini liya ku nga se akiwa timakete leti, tanihileswi a va phakela vukorhokeri etindhawini leti.

Loko swi ta eka mhaka ya timakete leti nga kona kusuka khale, Khoza u vule leswaku na kona va ha landzelerisa swinawana swa masipala, tanihileswi va nga laviki ku teka magoza ehandle ka ku landzelela maendlelo ya nawu.

U tlhele a vula leswaku timakete leti ku vulavuriwaka hi tona, ta ha ri ehansi ka vulawuri bya Ndzawulo ya Nhluvukiso wa Ikhonomi, Mbango na Vupfhumba ya Limpopo (LEDET) na swona a ti se nyikeriwa ximfumo eka masipala wa Giyani, hikokwalaho masipala wu nga se tekaka vutihlamuleri bya ku ti hlayisa.

U kombisile leswaku lava tirhisaka timakete leti enkarhini wa sweswi va fanele ku humesa vutiyisisi bya mpfumelelo wo tirhisa ndhawu loko va fanele ku ya emahlweni va tirhisa ndhawu liya.