MINDYANGU YA 847 YI KUMA GEZI

Hi Themba Chauke

Masipala wa Giyani wu nyikerile ximfumo tiphurojeke tinharhu letikulu to nghenisa gezi eka mindyangu ya 847 emigangeni ya ka Maswanganyi, Risinga View, na le ka Makosha.

Nhlengeletano wo nyikela ximfumo, a wu rhangeriwile hi Meyara wa Giyani Thandi Zitha, na swona a wu khomeriwile eka Senthara ya Vuxokoxoko ya Giyani hi Ravuntlhanu, leswi kombisaka ku sungula ka tiphurojeke leti ti languteriweke ku fika emakumu hi tin’hweti ta nhungu, ku nga Nyenyankulu 2027. Muganga wa ka Maswanganyi wu ta ngheniseriwa mindyangu ya 348, Risinga View 343, kasi eka Makosha i 156.

Zitha u komberile tihosi na vaaki ku seketela van’watikondiraka hi nkarhi wa ku endliwa ka tiphurojeke leti, a tlhela a lemukisa hi swikoxo swo lava ku hakeriwa leswi nga vekaka tiphurojeke eka nxungeto. “Ndzi tsakile hikuva hi na vuyimeri ku suka eka tihosi namuntlha, hikuva ndzi lava ku hundzisa hungu leri faneleke ku tekeriwa enhlokweni,” ku vula yena.

Meyara u tshikelerile leswaku mpimanyeto wa phurojeke wu kongomisiwile ntsena eka kuya eka tihakelo to chela gezi, na swona a hi yona yo khoma xisana loko munhu a ya emahlweni ka nghala. “Loko ko koxiwa mali eka mukondiraka, swi vula leswaku phurojeke yi ta yima hikwalaho ko kayivela ka mali,” ku vula yena.

Zitha u tlhele a kombela vaaki ku papalata ku kombisa ku vilela leswi swi nga kavanyetaka migingiriko ya phurojeke.

U vule leswaku tihosi ti ta tlanga xiave xa nkoka ku fambisa migingiriko yo thola vatirhi emigangeni, hi ku rhamba vaaki ku va tivisa hi swivandla swa mitirho leswi nga kona.

Hambiswiritano, swivandla leswi lavaka vuswikoti byo hlawuleka swi ta rhanga swi navetisiwa eka vaaki, laha van’watikondiraka va pfumeleriwaka ku thola vatirhi va vuswikoti byo hlawuleka kusuka kun’wana loko va nga kumeki etindhawini ta vaaki. “Hi kombela nseketelo wa n’wina hikuva vaaki va lava gezi. Hi nyikile van’watikondiraka tin’hweti ta nhungu ku heta ntirho lowu, kambe loko va kota ku wu heta hi tin’hweti ta tsevu, na swona swi ta va kahle,” Zitha uya emahlweni.

U tlherile a basisa leswaku tiphurojeke leti a ti nge vi na van’watikondiraka lava nga ta tirha ehansi ka tikondiraka leti hikuva mali ya kona yi le hansi swinene. Zitha u tlhele a lerisa tikhanselara ku seketela van’watikondiraka na ku tiyisisa leswaku phurojeke leyi yi famba kahle swi nga ri na mhaka leswaku yi tirheliwa eka wadi yihi.

U lemukisile tikhanselara eka mukhuva wo koxa timali eka van’watikondiraka, laha a vuleke leswaku miholo ya vona yi hakeriwa hi masipala. “Kuhava mukhanselara loyi a faneleke ku koxa tihakelo eka van’watikondiraka. Van’watikondiraka a va koloti tikhanselara mali,” wa lemukisa.

U hlohleterile van’watikondiraka ku hakela vatirhi va vona kahle na hi nkarhi ku sivela mikwetlembetano ya vatirhi na ku kombisa ku vilela leswi nga hoxaka xandla eka ku hlwela ka phurojeke. Meyara u vule leswaku pfhumba ra ku hoxiwa ka gezi ri kongomisiwile eka ku antswisa ku fikeleleka ka gezi eka miganga yinharhu, loko ku tlhela ku tumbuluxiwa mikateko ya mitirho eka vaaki ku tirha eka phurojeke leyi.