TISULAVOYA TI PHANGA EKA XIKOTIKOTI

Hi Themba Chauke

Maphorisa ya Tiko ra Afrika-Dzonga, eGiyani, ya simekile musecho wo hlota vavanuna vakhume lava ku ehleketeleriwaka leswaku hi vona va nga phangha eka Xikotikoti emugangeni wa ka Mageva hi Ravumbirhi.

Kuya hi maphorisa, vaehleketeleriwa va fikile endlwini ya mutwisiwa ku vava hi kwalomu ka awara ya n’we nimixo, laha va nga kuma mutwisiwa ku vava wa malembe ya 28, loyi ku nga muhlapfa, tlhelo n’wini wa xiphaza a khudzeherile na vamakwavo vakwe vanharhu.

Vamakwavo lava va pfuxiwile hi huwa ya matimba hi nkarhi lowu vaehleketeleriwa a va tirhisa matimba ku pfula rivanti ra nsimbhi endlwini leyi a va khudzehele eka yona. Hi ku copeta ka tihlo, vavanuna vamune lava a va hlomile hi swibamu va nghenile ekamareni ra byetlelo, va va kombetela hi swibamu. Vaehleketelriwa vambirhi a va khomile swibamu swa tirhayifili, loko van’wana vambirhi va khomile swibamu leswitsongo.

Vaehleketeleriwa va xungetile vamakwavo hi swibamu va koxa mali na tin’wana tinhundzu ta nkoka. Ku vuriwa leswaku va tekile tiqingo ta mune ta ntsengo wa kwalomu ka R14,500, va nga si nghena endlwini va lava mali.

Ku vuriwa leswaku vaehleketeleriwa va sechile tikamara to hlaya ta le ndlwini, laha va nga kota ku kuma ntsengo wo hlaya wa mali leyi nga boxiwangiki. Va tlhele va yiva na movha wa xibebe wa Nissan NP300, lowu ku vuriwaka leswaku wu durha kwalomu ka R85,000, kutani va baleka endhawini yoleyo. Movha wa xibebe lowu yiviweke wu kumiwile wu sukeriwile exikarhi ka muganga wa ka Daniel Rabalela na le Lekgwareng.

Khomixinara wa maphorisa ya xifundzakulu xa Limpopo Lieutenant Jenerali Jan Scheepers, u sorile maendlelo lawa ya madzolonga yo hlasela muti lowu, laha a vuleke leswaku mhangu leyi i maendlelo ya madzolonga ya vuhlayiseki na vusirheleri ehenhla vatwisiwa ku vava.

Scheepers u vule leswaku timhangu ta muxaka lowu a ti nge pfumeleriwi kuya emahlweni exifundzenikulu laha a byeleke maphorisa ku tirha hi matimba ku khoma vanhu lava khumbhekaka. “A hi nge pfumeli leswaku swigevenga swi hlasela miganga ya ka hina, na swona maphorisa ya ta tirha hi matimba ku kuma vaehleketeleriwa,” ku vula yena. U tlhele a kombela vaaki ku pfuna hi vuxokoxoko lebyi nga pfunaka eka vulavisisi na ku kuma vaehleketeleriwa hi ku tihlanganisa na Sejeni Michael Shivuri, eka 082 729 0351, kumbe 08600 10111, kumbe maphorisa ya le kusuhi.