Mana wa vana vambirhi loyi anga tinyungubyisaka u nyikela 150 wa tilitara ta masi ya mavele eka bangi ya masi ya vanhu
Magidi ya tincece ti vuyeriwile eka masi lawa ya nyikeriwaka hi nwansati loyi.
Manana loyi a nga na vutianakanyi wa vana vambirhi u nyikerile ku tlula 150 wa tilitara ta masi ya mavele eka nkarhi wa tsevu wa tinhweti eka bangi ya masi ya Netcare Ncelisa human [bank], ku nyika masi ya mavele lama fuweke hi swakudya eka ku tlula 30 wa tincece leti nga sirhelelekangiki leti nga kotiki ku kuma masi ya manana ya tona.
Verena Bolton u ri: “Nhlengeletano ya Rihanyo ya Misava Hinkwayo (WHO) yi ringanyeta leswaku tincece ti amukela masi ya mavele ntsena eka tin’hweti ta tsevu to sungula ta vutomi, tanihi leswi ma nga ni matimba ni swakudya leswi lavekaka eka tincece swin’we ni swidlaya-switsongwatsongwana leswi pfunaka ku sirhelela eka mavabyi yo tala lama tolovelekeke ya vana.”, muhlanganisi wa rixaka wa tibangi ta masi ya vanhu ya Netcare Ncelisa.
Geraldene Stumke u vula leswaku endzhaku ko tisa n’wana wa yena wa vumbirhi emisaveni eka tinhweti ta tsevu leti hundzeke u sungurile ku titimela masi lama tlulaka mpimo naswona swi hatle swi vonaka leswaku a ri na vuswikoti byo endla ku hambana lokukulu eka vutomi bya tincece tin’wana leti a ti ri ekhombyeni hi tlhelo ra swa vutshunguri.
“Loko ndzi twa hita ku nyikela hi masi ya mavele ndzi xiye leswaku ndzi ni lunghelo ro tlherisela hi ndlela yo hlawuleka. Endzhaku ko endla endlelo ro kambela minyikelo ndzi yise munyikelo wa mina wo sungula eXibedlhele xa Netcare Cuyler, lowu a wu ri na ntsengo wa 17 wa tilitara ta masi ya mavele.
U ri: “Ku sukela kwalaho ndzi hambete ndzi ya emahlweni, ndzi swi tiva leswaku minyikelo ya mina yi nyika tincece to tala swakudya leswinene ngopfu kasi yi tlhela yi pfuna vamanana ni mindyangu ya vona, leyi hakanyingi yi hlwelaka ku nyika masi ya mavele hikwalaho ka swivangelo swo hambana-hambana.”
Kuya hi Bolton, kutlula 3 230 wa tincece ti amukerile masi ya mavele lawa ya nyikeriweke kusukela loko ku sunguriwile tibangi ta masi ya vanhu ya Netcare Ncelisa hi 2017, leyi tirhaka ehansi ka vukorhokeri bya Netcare Foundation.
Tibangi ta masi ya vanhu ta Netcare Ncelisa ti tlhela ti nyika masi ya mavele eka swibedlhele eka xiyenge xa mfumo, ku katsa na Xibedlhele xa Rahima Moosa Mother and Child Hospital, Charlotte Maxeke Johannesburg Academic Hospital na Uitenhage Provincial Hospital. Ku sukela loko ku sungurile ntirhisano wa Netcare na xo sungula xa swibedlhele leswi hi Nhlangula 2019, ku tlula 770 wa tincece eka sekithara ya mfumo ti amukerile masi ya mavele ya vanhu lama nyikeriweke ku suka eka bangi ya masi ya vanhu ya Netcare Ncelisa.
“Masi ya mavele lama hlengeletiweke eka vaphakeri lava faneleke ya endliwa hi ku landza tiphrothokholi na milawu yo tika, ku tiyisisa vuhlayiseki lebyi heleleke eka tincece leti ma amukelaka. Hi na 36 wa tindhawu to hlengeleta masi ya vanhu eka tiyuniti ta ku veleka ta Netcare etikweni hinkwaro laha minyikelo yi nga yisiwa naswona hi amukela minyikelo yihi kumbe yihi na hinkwayo leyi endliwaka hi ku tirhisa maendlelo na tindlela ta hina leti nga kona.
“Manana Stumke na vaphakeri va hina van’wana vo tala va masi ya mavele va endla nkucetelo lowu vonakaka hakunene eka vaaki va hina naswona hikwalaho ka leswi hi va khensa ku suka embilwini ya hina. Mimbuyelo yo hlamarisa leyi u pfuneke ku yi fikelela i vumbhoni bya ku hanana ka wena na miehleketo ya vaaki eka ku endla xin’wana na xin’wana lexi u nga xi kotaka ku endla ku hambana.
“Hi tlhela hi navela ku khensa vatirhisani va hina vo hanana Ampath Laboratories ku endla ku kamberiwa loku lavekaka eka vakomberi hinkwavo va vaphakeri na SkyNet ku tiyisisa ku fambisiwa loku hlayisekeke ka masi hinkwawo ya mavele lama nyikeriweke etikweni hinkwaro, hi ku ya emahlweni ka pro bono,” ku gimeta Bolton.
Vavasati lava tsakelaka ku va vaphakeri va masi ya mavele va nga tihlanganisa na xibedlhele xin’wana na xin’wana xa Netcare lexi nga na switirhisiwa swo veleka.