Vadyondzi vambirhi va dlayiwile eka mhangu ya mimovha yinharhu egondzweni ro hakela ra N4 ekusuhi na Emalahleni

MPUMALANGA – Hi gome lerikulu swinene leswaku vadyondzi vambirhi va lovile eka mhangu ya mimovha yinharhu egondzweni ra N4 Toll Road ekusuhi na Emalahleni, Mpumalanga, Mhangu yo chavisa yi humelerile hi Ravumune nimixo.

Vadyondzi vo hlayanyana va vavisekile ku suka eka ku olova ku ya eka loku ringaneleke. Leswi swi humelerile loko mathekisi mambirhi ya mabazi lamatsongo na lori ya articulated swi tlumbana.

Vukorhokeri bya xihatla byi vitaniwile endhawini ya mhangu, hambiswiritano, lexi khomisaka gome a ku ri hava lexi va nga xi endlaka ku ponisa vadyondzi lavambirhi.

Muvulavuleri wa ndzawulo ya vuhlayiseki bya vaaki e Mpumalanga Moeti Mmusi  U vula leswaku ku hehliwa leswaku rin’wana ra mabazi lamatsongo ri nga va ri yimile kumbe ri hunguta rivilo egondzweni kasi lori se a yi ri ekusuhi swinene.

“Loko endzhaku ka sweswo yi chayise thekisi endzhaku, kutani thekisi yi tlhele yi tlumbana na le ndzhaku ka bazi leritsongo leri a ri ri emahlweni,” ku vula Muvulavuleri Moeti Mmusi.

Mmusi u yile emahlweni a ku, “Mimovha hinkwayo a yi famba hi tlhelo rin’we, loko mhangu yi ta humelela”.

U tlhele a kombela vachayeri va mimovha ku va va xalamukile swinene loko va famba hi patu ro hakela ra N4 na ku yingisa milawu hinkwayo ya le magondzweni.

Manana Refilwe Mtshweni-Tsipane, Holobyenkulu wa Mpumalanga, u teke riendzo ro ya laha mhangu yi nga humelela kona.

Vakhandziyi lava vavisekeke va yisiwe eka tindhawu ta rihanyo ta le kusuhi ku ya kuma vukorhokeri byin’wana bya swa vutshunguri, laha van’wana va lavaka ku rhurhisiwa hi xihahampfhuka.

Xivangelo xa mhangu leyi a xi se tiveka, kambe vulavisisi se byi le ku endliweni.