Vaaki Va Pfala “Construction sites” ya Mkhacani Mzamani Primary School
Vaaki va ka Maphophe Va Lava Mintirho
MAPHOPHE – Hi ku kombisa ku vilela, vaaki va muganga wa ka Maphophe va tekile goza ro pfala ndhawu yo aka’ Construction sites ‘ xikolo xa le hansi xa Mkhacani Mzamani. Swirho swa vaaki swi hehle Mukondekitara loyi hi ku honisa ku tsakela ka vona hi ku thola vatirhi lava humaka ehandle ka muganga wa ka Maphophe, ngopfu-ngopfu ku suka exifundzheninkulu xa Free State.
Murhangeri wa komiti ya Vaaki exikolweni Kulani Simango, u kombisile ku vilela hi xiboho xa Mukondekitara xo honisa vaaki va ndhawu leyi ku kuma swivandla swa mintirho exikolweni.
Kuya hi Simango, ntirho wo aka wu kongomisiwile ka ku nyika swivandla swa mitirho eka vaaki va ka Maphophe na ku ndlandlamuxa ikhonomi ya le mugangeni.
Hambiswiritano, ntiyiso wa mhaka hi leswaku, leswi a va swi languterile a swi vangi tano, laha ku hehliwaka leswaku Mukondekitara u ta na vanhu va yena leswaku a ta va nyika mintirho, handle ko nyika vanhu va ka Maphophe mintirho.
“Phurojeke leyi yi fanele yi pfuna vaaki va hina ku kuma mintirho, leswaku va ta tlakusa ikhonomi ya la ha tikweni. Khombo ra kona, a hi vuyeriwi hilaha hi faneleke ku vuyeriwa hakona, tanihileswi Mukondekitara a tholaka vanhu vo huma ehandle ka muganga wa hina,” ku vula CIO Simango.
“Hi tshemba leswaku hambileswi vatirhi va vutshila va nga kumiwaka ku suka kun’wana, swivandla swa vatirhi hi ku angarhela swi fanele ku nyikiwa vaaki va ndhawu leyi, ku tiyisisa leswaku phurojeke leyi yi hluvukisa vaaki va hina,” ku enegeta Simango.
Endzhaka ka loko vaaka tiko va vutisa leswaku switshuxo ka mhaka leyi hi swihi, Ndhuna Maphophe va vurile leswaku, “Mina ndzi ri mukondekitara u fanele ku thola vanhu va laha tikweni leswaku ku ta vuyeriwa vona, hayi leswaku a ta na vanhu hikwalomo.”
Mpfilumpfilu lowu, wu tlakusa swivutiso mayelana na vutihlamuleri bya Mukondekitara na ku langutela ka vaaki eka tiphurojeke to nhluvukisa muganga. Vakondekitara va nga thola vatirhi vo hlawuleka ku suka ehandle leswaku va ta endla ntirho wa khwalithi, kambe ku tlhela ku va na mhaka yo nghenisa vatirhi va laha kaya ku vuyerisa vaaki na ku tlakusa ku kula ka ikhonomi.
Loko ku pfala ka ndhawu yo aka ku ya emahlweni, ku tshembiwa leswaku xiboho xi ta fikeleriwa hi musumbunuko naswona loko mukondekitara wo ka a nga tholi vaaka tiko va ka Maphophe ku vuriwa leswaku ndhawu leyi yi ta tama ya ha pfariwile.
