Bindzu ra Mat Bakery ri endla Ku Hambana eka Vaaki

PHAWENI – Hlangana na Matimba Hlungwani, Muntshwa wa ku huma emugangeni wa Phaweni ehandle ka Malamulele loyi a nga tshama a va na ku navela ku baka.

Nhlohlotelo wa yena lonkulu akuri manana wa yena, loyi a tolovele ku baka naku xavisa Magwinya leswaku ata tihanyisa xikanwe na ndyangu wakwe.

Loko inflexini yi sungula ku tlakuka la ha tikweni, Matimba u swi vonile leswaku u fanele ku tisungulela bindzu ra yena leswaku a ta sirhelela vumundzuku bya yena bya swa timali. Naswona hi yihi ndlela yo antswa ku tlula ku hlanganisa ku navela ka yena ka ku baka na vubindzurisi?

Endzhaku ko hlela na ndzavisiso hi vukheta, u pfule Mat Bakery eProtea South, Soweto exifhundzenikulu xa Gauteng hi Nyenyankulu 2021 hi nkarhi lowu tiko a riri ka Level 3 ya lockdown. “Eku sunguleni, a hi kota ku baka ntsena 60 wa swinkwa hi awara, naswona a hi ri na vatirhi vambirhi,” ku vula n’wini wa bindzu ra Mat Bakery Matimba Hlungwani.

“……kambe xilaveko lexikulu ku suka ka vaxavi vahina xi hi susumetele ku engetela vuswikoti bya hina byo baka ku ya eka 140 wa swinkwa hi awara ku nga si hela n’hweti tingani tingani,” ku vula Hlungwani.

Mat bakery yi hatle yi va na duma emugangeni. Xana Xihundla xa vona hi xihi? A va nyiki ntsena swilo swo hambana-hambana swo nandziha leswi bakiweke, kambe va tlhela va swi endla hi ndlela ya xihundla leyi yi endlaka leswaku vaxavi va vona va tsakela swakudya swa vona.

“Hi na ti-rolls to hlawuleka na ti-buns leti vanhu va ti tsakelaka swinene emugangeni wa Phaweni na le tindhawini tin’wana ta le kusuhi,

“Leswi swi endla leswaku hi nxavisela switolo swo hambana-hambana, ku katsa na switolo leswikulu hambi ku ri tirhesiturente ta swakudya leswi hatlisaka ta laha kaya,” A engeta.

” Xinkwa xa hina na xona i xa kahle swinene naswona i xa nkoka swinene eka rihanyu ra vaxavi va hina,” ku vula Hlungwani.

Hlungwani u yile emahlweni a ku, “Hi tshama hi ri karhi hi lava ku antswisa khwalithi ni nantswo wa swilo swa hina leswaku hi phikizana na tibekara tin’wana tanihi leswi tibekara to tala tibakaku swinkwa swo koka rinoko ka vaxavi van’wana”.

Kambe a hi khwalithi ya swakudya swa vona ntsena leyi endlaka leswaku Mat bakery yi hambaniseka na ti bekara leti n’wanyana.

Vona [Mat Bakery] Va tlhela va tinyungubyisa hi ku tlherisela eka vaaki, Hlungwani u vule leswaku va na phurojeke ya vuhlayiselo bya xichavo [Sanitary dignitary project] eSoweto.

” Hi Phurojeke ya hina, hi pfuna vanhwanyana va malembe ya kondlo-a-ndzi-dyi (Teenager) ku tshama va hanye kahle no hlayisa xindzhuti xa vona hi ku va nyika maphakiti mo hlawuleka ma nga na swilo leswi va swi lavaka leswaku va ta kota ku ya exikolweni no va na vutomi bya nkarhi na nkarhi,” ku vula Hlungwani.

Matimba u yile emahlweni a ku, ” emugangeni wa Phaweni hi karhi no vulavurisana na swipano swa bolo ya milenge hi ku swi seketela hi timali kumbe swin’wana. Leswi swi ta pfuna vaaki hi ku veka vantshwa ekule na swilo swo biha swo fana na swidzidziharisi, vugevenga, na ku tika ka vantshwa va xinsati karhi wu nga se fika,”

Mat Bakery yi tlhela yi pfuna eka vaaki tanihi leswi yi va nyikeke swivandla swa mitirho, leyi i ndlela yo pfuneta ku lwisana na xikungumana xa ku pfumaleka ka mintirho emugangeni hambi ku ri etikweni ra Afrika dzonga.

“Hilaha swi nga hakona, sweswi hi kotile ku thola vanhu va Tsevu [6] emugangeni wa Phaweni, hikwavo i vanhu va laha kaya naswona i vantshwa, 60% wa vona i vavasati,” ku engetela Hlungwani.

Hlungwani a nga se gimeta u hlamuserile xivono xa yena tanihi murhangeri wa Mat Bakery, u vurile leswaku, “xivono xa mina i ku vona Mat Bakery yi tiviwa tanihi bindzu leri tshembiwaka, yi thola vanhu vo tala ku suka eka miganga yo hambana.”

“ Ndzi tlhela ndzi lava ku pfula xikolo xo baka hala ka Malamulele, laha tidyondzo to baka ti nga ta va mahala eka vana lava nga riki na vatswari na vanhu lava nga na vutsoniwa,”