Ku Buluka Ku koxa Vutomi eXitarateni xa Bree eJohannesburg
Johannesburg City Centre yi hlaseriwile hi khombo tolo loko ku buluka phayiphi ya Gasi exitaratini xa Bree, naswona ku vikiwa leswaku munhu un’we u hundzile emisaveni.
Mhangu leyi yi siye tiko ri hlamarile no rila, loko swipano swa xilamulela Mhangu swi nga le ku tirheni hi matimba ku lawula vuyelo bya kona na ku tiyisisa vuhlayiseki bya vaaki hinkwavo.
Muvulavuleri wa EMS, Robert Mulaudzi, u kombisile ku vilela lokukulu, a vula leswaku ka karhi wa sweswi ku tiyisisiwile ku koxiwa ka vutomi hi kwalano ka ku buluka loku.
“Sweswi munhu un’we u lovile endzhaku ka ku buluka loku nga handzula xitarata xa Bree exikarhi ka doroba ra Joni,” ku vula muvulavuleri wa EMS Robert Mulaudzi.
” Naswona a hi nge swi koti ku bakanyela etlhelo mhaka ya leswaku hi nga ha kuma vanhu van’wan vahundzile emisaveni, kumbe ku vaviseka,” ku engeta Mulaudzi.
Ku vikiwa leswaku Valawuri va hlamule hi xihatla eka mhangu leyi, no tlhela va hlengeleta vukorhokeri bya xihatla na ku tirhisa switirhisiwa swo engetela ku lawula xiyimo.
Xivangelo xa ku buluka loku a xi se tiveka, naswona vulavisisi byi le ku endliweni sweswi ku voningela mhangu leyi.
Loko ntirho wo lavisisa na ku ponisa wu ya emahlweni, vatirhi va xilamulelamhangu va tirha hi ku hiseka ku tiyisisa vuhlayiseki bya vanhu hinkwavo lava nga ha vaka va khumbekile.
Loko vulavisisi byi ri karhi byi ya emahlweni, i ntshembo wa Afrika dzonga leswaku tinhlamulo ti ta kumiwa, ku tiyisisa leswaku vululami bya tirhisiwa na ku sivela timhangu to tano ku humelela enkarhini lowu taka.
Kasi loko ku ri va Egoli Gas vona va humesile hungu va kombisa leswaku a hi phayiphi ya vona leyi yinga buluka naswona mingikiriko ya vona a yi kavanyetiwangi.
