Meyara wa nkarhinyana Cllr Muvikane wa Collins Chabane U Xixima Siku Ra Mandela Hi Ku Pfuxeta Ntshembo Ka Vadyuhari
Malamulele – Eka nkombiso wo tsakisa wa ntwela vusiwana na vun’we, Meyara wa nkarhinyana Cllr Simon Xihlamariso Mavikane u rhangele vurhumiwa ku suka eka Masipala wa Muganga wa Collins Chabane ku tsundzuka siku ra Mandela hi ku nghenela ntirho wa vaaki ekaya ra Vadyuhari ra Hlayiseko eka Malamulele.
Xipano lexi xi hete timinete ta xona ta 67, tani hi leswi xi hlohloteriweke hi mufi Nelson Mandela, xi hangalasa ntsako na nkhathalelo exikarhi ka vaaki lava dyuhaleke ndzo rhandzeka.
Hi ku heleketiwa hi varhangeri va vaaki lava xiximiwaka, ku katsa na Hosi Xigamani na Hosi Madonsi,na van’wana. Meyara wa nkarhinyana na vurhumiwa bya yena va fikile eKaya ra Vadyuhari ra Hlayiseko va tele hi ku hiseka na ku tinyiketela loku avelaniwa ku endla nkucetelo lowunene eka vadyuhari.
Hi ku kufumela lokukulu na rirhandzu, Meyara wa Nkarhinyana hi yexe u nyikile swiambalo, switirhisiwa swo hlamba, na swakudya eka vaaki lava dyuhaleke, a tiyisisa leswaku swilaveko swa vona swa xihatla swa fikeleriwa loko a ri karhi a hundzisela rungula ra ku tlangela na xichavo.
Moya a wu tele hi ku tlangela loko varhangeri va vaaki va nghenelerile eka mabulo lama humaka embilwini, va lomba ndleve yo yingisela na ku nyika marito yo khutaza eka vadyuhari lava vitanaka kaya leri ra vona.
“Moya wa Siku ra Mandela hinkwawo wu vulavula hi ku pfumala vutianakanyi na ntwela vusiwana,” ku kombisa Meyara wa nkarhinyana Mavikane.
“Ku endzela ka hina eKaya ra Vadyuhari ra Hlayiseko a ku ri xiendlo xo titsongahata ku xixima vaaki va hina lava dyuhaleke lava nga tlanga xiave xa nkoka eku vumbekeni ka vaaki va hina,” Ku engeta cllr Mavikane.
” A ku ri nkarhi eka hina ku kombisa ku tlangela ka hina na ku va tivisa leswaku va tekiwa va ri va nkoka no rhandziwa,” KU ngimeta cllr Mavikane.
Hlayiseko Old Age Home, ndhawu yo hlayisela vanhu lava dyuhaleke, yi tsakile swinene ku kuma ku hoxa xandla lokukulu swonghasi ku suka eka Masipala wa Muganga wa Collins Chabane.
Ku tinyiketela ka vona ku xixima Siku ra Mandela hi ku tlakusa vadyuhari emugangeni wa vona swi tirha tani hi xitsundzuxo xa leswaku musa, ntwela vusiwana, na ku pfumala vutianakanyi swi nga hlanganisa tinxaka na ku kurisa rixaka leri tekelaka enhlokweni no hlayisa swirho swa rona leswi nga sirhelelekangiki ngopfu.
Riendzo ra Meyara wa nkarhinyana Mavikane eKaya ra Vadyuhari ra Hlayiseko handle ko kanakana ri ta siya nkucetelo lowu nga heriki eka vaaki.
