Ku tlula 30 wa vadyondzi va tsutsumiseriwa exibedlele

Share the News

Hi Ntsakisi Gracia Chauke

Ndzavisiso wu ya emahlweni exikolweni xa le hansi xa Makahlule emugangeni wa Ntlhaveni Block H, ehandle nyana ka Malamulele endzhaku ka ku vabya ka ku tlula 30 wa vadyondzi naswona va boheke ku yisiwa exibedlhele hi Ravunharhu wa siku ra vu 9 Hlangula. Ku vikiwa leswaku vadyondzi va sungule ku hlanta no titwa va nga ri kahle endzhaku ko dya swakudya leswi ehleketeleriwaka ku swi ri na chefu.

Hi ku ya hi ndzawulo ya dyondzo ya xifundzhankulu xa Limpopo, vadyondzi va 22 eku sunguleni va yisiwe etliliniki ya le kusuhi endzhaku ko hlanta. Endzhaku va hundziseriwe exibedlhele xa Malamulele, laha va nga tshunguriwa va tlhela va humesiwa. Endzhakunyana ka sweswo, ntlawa wun’wana wa vadyondzi va 13 na wona wu tsutsumiseriwe exibedlhele, tanihi leswi a wu vilela hi ku pandza ka nhloko ni ku vava ka khwiri.

Ku ehleketeleriwa leswaku vadyondzi va vabye endzhaku ko dya swakudya leswi phakiwaka exikolweni na swakudya swin’wana leswi xavisiwaka hi vaxavisi ehandle ka xikolo.

“Swakudya leswi humaka exikolweni swi ta tekiwa ku ya kamberiwa ku kumisisa leswaku i yini lexi vangeke vuvabyi lebyi. Ku ta tlhela ku kamberiwa mati lawa ya humaka eka borehole ya xikolo ku tiyisisa leswaku ya hlayisekile ku nwa,” ku vula Mosebjane Kgaffe, ku suka eka vuhlanganisi bya Ndzawulo ya Dyondzo.

Mhangu leyi yi ta endzhaku ka n’hweti ntsena endzhaku ka mhangu yo fana na leyi eGauteng, laha vadyondzi vo hlaya ku suka exikolweni xa le hansi na vona va nga vabya endzhaku ko dya swakudya leswi phakiwaka exikolweni. Eka mhangu leyi ku tiyisiwile leswaku swakudya a swi ri ni chefu, naswona valawuri va boheke ku nghenelela hi ku yimisa ku phakiwa ka swakudya swa xinkarhana loko va ri karhi va endla vulavisisi lebyi heleleke.

Mhangu leyi yi pfuxe ku vilela hi khwalithi na vuhlayiseki bya swakudya leswi nyikiwaka vadyondzi, ngopfungopfu eswikolweni leswi titshegeke ngopfu hi minongonoko leyi ku seketela vadyondzi lava humaka emindyangwini leyi holaka mali ya le hansi.

Hambiswiritano, Ndzawulo ya dyondzo yi tiyisisile vaaki leswaku yi teka mhaka leyi yi ri ya nkoka. Yi tshembisile ku teka goza hi ku hatlisa ku kuma xivangelo xa xiphiqo na ku tiyisisa leswaku swakudya hinkwaswo leswi hangalasiweke hi minongonoko ya xikolo swi hlayisekile ku dyiwa. Vuhlayiseki bya mati na byona i nchumu wa nkoka, tani hi leswi swikolo swo tala etindhawini ta le makaya swi titshegeke hi ti boreholes ku kuma mati yo nwa.

Vatswari va hlohloteriwa ku tshama va rhulile loko vulavisisi byi ri karhi byi ya emahlweni, naswona vaxavisi lava xavisaka swakudya ehandle ka xikolo va tsundzuxiwa ku tiyisisa leswaku swakudya leswi va swi xavisaka swi hlayisekile.

Vatirhi va swa rihanyo va le ku vekeni tihlo swinene eka xiyimo lexi, naswona Ndzawulo ya Dyondzo yi tshembisile ku vikela vatswari na vaaki loko vuxokoxoko byo tala byi ri karhi byi humelela.

 

 

 

 

 

 

 

 

 

 

 

 

 

 

 

Mathunse Hlukani

Hlukani Mathunse is a talented journalist and media professional with a passion for storytelling and community engagement.

Mathunse Hlukani has 381 posts and counting. See all posts by Mathunse Hlukani

Leave a Reply

Your email address will not be published. Required fields are marked *