Wanuna a ti vonakarisa ekhoto

Hi Themba Chauke

Wanuna wa makume mune nhungu wa malembe hi vukhale u humelerile ekhoto ya majistarata ya Tiyani hi Ravuntlhanu, a hehliwa hi nandzu wo dlaya endzhaku ka loko ku hehliwa leswaku u dlaye xerifi ya le khoto emugangeni wa Tiyani, endhawini ya Hlanganani. Mhangu leyi yi hlamarisile vaaki naswona yi pfuxe ku vilela hi vuhlayiseki bya vatirhela-mfumo va nawu lava endlaka mintirho ya vona.

Swiviko swi paluxa leswaku mhangu yi teke ndhawu hi Ravumune wa ti 13 ta Nyenyenyani, loko xerifi a endzela ndhawu ya muehleketeleriwa ku ya nyika xileriso xa khoto xo teka lori ya Hino 700. Xiyimo xi hundzuke xo tika laha ku hehliwaka leswaku muehleketeleriwa u balesele xerifi loko a fika. Endzhaku ka ku balesela, muehleketeleriwa u balekile, a siya xerifi a vavisekile swinene.

Valawuri va hatlise va fika endhawini ya mhangu. Swipano swa maphorisa hiku hambana hambana swi vitaniwile ku ya lavisisa. Ku nga khathariseki matshalatshala ya vona, a ya kotanga ku khoma muehleketeleriwa eka vusiku byebyo.

Muehleketeleriwa loyi wa malembe ya 49 hi vukhale u hlamarisile vanhu hinkwavo hi ku tinyiketa eka maphorisa va nga si n’wi khoma. Kutani u yisiwe xitokisini xa maphorisa  eHlanganani naswona u hehliwa hi ku dlaya xerifi. Hi nkarhi wa ku khomiwa ka yena, maphorisa ya tekile xibalesa xa yena xa 9mm lexi nga na layisense na matlulu ma mbirhi ku ya emahlweni na vulavisisi.

Muehleketeleriwa u ti vonakarise ro sungula ekhoto hi Ravuntlhanu vhiki leri hundzeke, laha nandzu wa yena wu hundziseriweke eka Ravunharhu ra vhiki leri ku ya endla xikombelo xa beyili. U tama a ha ri exitokisini loko maphorisa ya ya emahlweni na vulavisisi bya wona eka mhaka leyi.

Ku dlayiwa ka xerifi ku kombisile makhombo lawa vatirhela-mfumo va khoto na vatirhi va nawu va langutaneke na wona loko va ri karhi va endla mintirho ya vona. Mhangu leyi yi tlhele yi pfuxa mabulo mayelana na xilaveko xa magoza ya vuhlayiseki lama antswisiweke eka lava tirhaka hi swileriso swa khoto na maendlelo man’wana ya nawu.

Loko nandzu wu ri karhi wu ya emahlweni, vaaki va tshemba leswaku vululami byi ta teka ndhawu, kasi valawuri va tirha hi matimba ku hetisa vulavisisi. Ku ya ka yena loku landzelaka ekhoto ku languteriwe ku koka rinoko ra swirho swo tala swa vaaki leswi lavaka ku vona vululami byi endliwa.