Maxelo Radio yi pfala MALA FM 101

Muntshwa Mandla Mchavi,u vile na norho wo hlanganisa vanhu hiku tirhisa xiyani moya tani hi muhaxi, leswaku a ta kota ku hangalasa mahungu ya nkoka eka vaaki, kambe norho wa yena a wu kotangi ku humelela tani hi leswi swinga oloviku ku thoriwa eka xiyani moya.

Tanihi leswi ku nga ri ku na Xitichi xa Xiyani Moya (Radio) xa Vaaki eka Malamulele, Mchavi u vone vangwa leringa pfuleka kutani a nsimeka xitichi xa xiyani-moya xa inthanete, Maxelo Radio, lexi nga na vuswikoti byo fikelela ntshungu lowukulu swinene hi ku copeta ka tihlo.

Ku pfumaleka ka xiyani moya eka Malamulele swiva kona endzhaku ka loko xitichi xa vaaki xa Malamulele Community Radio Station lexi xitivekaku swinene tanihi MALA FM, xitava xipfariwile hikwala ka swihehlo swa timali.

Mandla Mchavi u boxile leswaku “Maxelo Radio yi tumbuluxiwile ku hlanganisa vaaki va ka Malamulele, tanihi leswi ndhawu leyi sweswi yi nga riki na xitichi xa xiyani moya lexi tirhaka.” U yile emahlweni a vula leswaku “xitichi lexi (Maxelo Radio) xi pfuna vanhu leswaku va tshama va ri karhi va tivisiwa hi swilo leswi swi humelelaka emugangeni, va tlhela va kuma dyondzo xikanwe na ku tsakisiwa.

Mchavi u yile emahlweni a vula leswaku “Tanihi Maxelo Radio hi tiyimiserile ku nyika vayingiseri va hina swilo leswi faneleke na marungula lama nga na nhlamuselo, ku fana na swiviko swa timhaka ta sweswi, minjhekanjhekisano, na mimbulavurisano. Ku engetela kwalaho, xitichi lexi xi tlhela xi nyika swivumbeko swin’wana swa vuhungasi lebyi nga riki bya vuteki bya Mahungu byo tanihi vuyimbeleri ni tidrama ta xiyani-moya.”

“Maxelo Radio yi hambanile swinene na switichi swin’wana swa swiyani-moya swa inthanete, naswona hi yona ntsena leyi kumekaka eMalamulele. Ku ya emahlweni, vufambisi bya yona byi na ntokoto wo woenta eka vuhaxi,” ku engeta Mchavi.

“……tanihi varhangeri va Maxelo Radio a hi paluxi tindlela ta hina ta xihundlha, kambe ku hlamula xivutiso xa n’wina, hi na ntlawa wa vanhu va nkucetelo “influences” lava tirhaka na hina ku hangalasa hungu ra Maxelo eka swihangalasa mahungo swa vona,” Ku engeta Mchavi.

U ye emahlweni a vula leswaku, “eka tinhweti leti taka Maxelo Radio yi ta va yi fambisa vuhaxi bya le handle eswikolweni swa le kusuhi, leswaku hi ta ntumbuluxa vuxaka na va seketeri va hina, xikan’we no nyika vadyondzi pulatifomo yo tiva swo tala hi xiyani moya kumbe Vuhangalasi bya Mahungu.

Maxelo Radio yi fana na minhlangano yin’wana na yin’wana, tanihi leswi na yona yi hlanganaka na mintlhontlho yo hambana-hambana, hambi Kungava xitichi xa xiyani-moya xa inthanete kumbe xa ndhavuko, xi na mintlhontlho ya timali na switirhisiwa swin’wana leswi lavaka ku fikelela leswaku vukorekeri bya vona bya siku na siku byi kota ku humelela.

Hambi leswi Maxelo Radio yi nga na swiphiqo swa timali, n’wini wa yona u vule leswaku va rhumele swikombelo swa timali eka mabindzu yo hambana-hambana. Mchavi, u kombisile leswaku “Hi rhumele swiringanyeto eka tikhamphani ta mfumo na ta phurayivhete, hi kombela mpfuno wa timali na ntirhisano, naswona loko kuri rivoni ra ti komba ku vonikela hambi leswi ringa kule na hina,”

Masiku lawa vanhu a va nga ri na ndlela yin’wana handle ko yingisela xitichi xin’we xa xiyani-moya ma hundzile; masiku lawa, vayingiseri va na switichi swo hambana swa xiyani-moya leswi va nga hlawulaka eka swona ku ya hi muxaka wa rungula leri va nga tsakelaka ku ri twa hi karhi wa lowo.

Murhangeri Mchavi u kombisile leswaku Maxelo Radio yi tekile magoza lamakulu ku tiyisisa leswaku swilo swa vona swi tshama swi ri leswintshwa no tlhela swi endla leswaku vahlaleri vatsaka.

Mchavi u kombisile leswaku xiyani moya xa vona xina na ntlawa lowu nga na ntokoto lowu kotaka ku lavisisa mahungu ya karhi wa sweswi, naswona vahaxi va vona va swikota ku swi hundzisela eka vayingiseri hi ndlela ya xiphurofexinali na ku naveta.

N’wini wa Maxelo Radio u tivise leswaku xitichi xa Maxelo Radio xi ta sunguriwa ximfumo ku nga ri khale, kambe a  nge swi koti ku vula siku leri kongomeke tanihileswi va ha ri ku na njhekanjhekisana na swirho swin’wana. Eka nkarhi wa sweswi, va kota ku phamela vayingiseri minongonoko yimbirhi ntsena ku nga – Maxelo Drive , Bondla na hina na Education Show: hi nomo wa Favour M, Khanyisa, Aubrey xikan’we na Dj Carniey.