Mufambisi wa Xitichi xa Maphorisa xa Malamulele a tshikelela nkoka wa dyondzo no tlhela a Nyikela

Mufambisi wa Xitichi xa Maphorisa ka malamulele Colonel Rikhotsi K.E u hlohlotele vadyondzi ku rhangisa dyondzo evuton’wini bya vona. A vula leswi eka Event leyi a yi khomiwile hi Ravuntlhanu laha yunifomo ya swikolo na Tintanghu ta xikolo swi nyikeriwile eka swichudeni swo hambana, Kolonele Rikhotsi u kandziyisile nkoka wa dyondzo eka ku herisa vusweti na ku fikelela swikongomelo leswi munhu a nga na swona vutomi bya yena.

“Ndzi pfumeleleni ndzi mi khutaza leswaku dyondzo i xilotlelo evuton’wini lebyi,” ku vula Kolonele Rikhotso. “Handle ka dyondzo, a mi yi helo, vana va mina lava rhandzekaka. Hi laha ku mi khutaza ku teka dyondzo evuton’wini bya n’wina hikuva yi ta mi pfuna ku lwisana na vusweti, hambi ku yi tirhisa tanihi tlhari ku kota ku lwa nyimpi ya leswi mi navelaka kuva swona evuton’wini.”

Dyondzo i ya nkoka hikuva yi hi pfuna ku dyondza swilo leswintshwa, ku teka swiboho swo tlhariha, na ku pfuna miganga ya hina hambi kuri mindyangu. Khombo ra kona, swichudeni swin’wana swi na swiphiqo swo kota kuma dyondzo hikwalaho ka mali, switirhisiwa, na mikhuva ya ntshamisano hambi kuri swin’wana swotala.

Hi yona mhaka leyi minkhuvo yo fana na leyi a yi khomeriwa eholweni ya vaaki ya Malamulele, laha tiyunifomo na tintanghu ta swikolo a ti nyikiwa swichudeni, swi nga swa nkoka swinene. Hi ku susa swin’wana swa swiphiqo swa timali, swichudeni swo tala swita kota ku fikelela dyondzo handle ka ku tikeriwa.

kambe ku hangalasa yunifomo ya xikolo ni tintanghu i xiphemu xin’we ntsena lexi lulamisiweke xa ntlhantlho lowu. Nakambe i swa nkoka ku ya emahlweni hi tlakusa nkoka wa dyondzo, ku khutaza swichudeni ku landzelela milorho ya swona, na ku nyika switirhisiwa leswi lavekaka na nseketelo ku swi pfuna ku fikelela swikongomelo swa swona.

Loko Mufambisi wa xitichi a ya emahlweni u te “ Ndzi pfumeleleni ndzi mi byela leswaku dyondzo hi yona yi ri yoxe, leyi nga kota ku mipfuna leswaku mi kota ku fikelela ku navela ka n’wina, Loko mivona dokodela Maluleke lava, va lo dyondza kuhava na wun’we loyi a nga kotaka kuva dokodela a ngari na dyondzo.,”

Kasi Baloyi Tintswalo loko a yimela machudeni u vurile leswaku “ Hiku yimela Machudeni hikwamu hi rhandza ku khensa ku hlohloteriwa hi tinyiko leti mihi nyikaku tano,”Tintswalo u ngimetini hiku tshembisa maphorisa xikan’we na vanhu hikwavo lava vanga hoxa xandla leswaku vata tiyisela etidyondzeni ta vona.

Mufambisi wa Xikolo Ttn Khosa M.A, u yimile a kombisa ku khensa ka tirho lowu endliwaka hi Maphorisa lani a vulaka leswaku Maphorisa ya ka Malamulele ya n’wi ntlhotlhini swinene lani a nga tshikelela leswaku swikolo swifanele ku endla mhaka ya social development ku kota ku lwisana na ku tikeriwa ka vana.

Tanihi leswi tirho lowu a kuri ku khomisana exikarhi ka Maphorisa ya ka Malamulele na Foramu ya Maphorisa [CPF] ya le ka Malamulele. Lani xirho xa CPF xi nga vula leswaku “Loko hi ya eswikolweni hi languta swilo switala ku katsa na ku tikeriwa ka vana hambi ku ri swirhalanganyo leswi vana va hlanganaka na swona eswikolweni”.
Hikuya hi Muvulavuleri wa Maphorisa ya ka Malamulele Serg Khuzwayo, u vula leswaku xitichi xa Malamulele xina nongonoko lowu vuriwaka leswaku Back to School Campaing naswona va yi thyile vito ra safer school Programme lani va kotaku ku enzhela swikolo swohambana ehansi ka muganga wa ka Malamulele.

“Hina nongonoko lowu wu vuriwaka Safer School lani hi kotaku ku endzela swikolo swotala xikan’we na miganga leswaku hi kota ku lemukisa machundeni ku papalata kuti nghenelerisa eka mintlawa ya vanhu lava vanga na khombo eka vaaki hambi kuri ku ya eswikolweni na switlhava-ntlhavana swohambana,” ku vula Muvulavuleri wa Maphorisa ya ka Malamulele Sejeni Khuzwayo.

“Hambi ku ngari swikolo tsena na le migangeni haya kuya hangalasa hungu leri, lani hi kotaku ku hlohlotela vantshwa va hina leswaku va tshika ku tsutsuma na timhaka ta mabyalwa kambe va vuyela eswikolweni ku kota ku tanihi dyondzoku leswaku va ta lwisana na vusweti,” ku engeta Serg Khuzwayo.

Muvulavuleri Khuzwayo u yile emahlweni a vule leswaku maphorisa ya swikota ku ya eswikolweni swi nga languteriwanga ku kota ku endla misecho yo hambana naswona va tirhisana na xiyenge xa K9. “Lexi xini hlamarisaka ngopfu, loko hi ya eswikolweni hi ya endla misecho hi leswi hi talaku ku swikuma, ku fana na leswi yirisiweke swo tanihi byala, swidzidzirisi, mbangi hambi ku ri switlhavana swo tanihi mikwana”.

“Endzhaku ka loko hi kumile swilo leswi yirisiweke, tanihi Maphorisa hi burisana na vufambisi bya xikolo ku kota ku kuma tlhelo ra vona no kuma leswaku va tikeriwa kwihi kasi swichudeni leswi kumiweke swi ri na swilo swo tano, switekiwa swi yisiwe exitichini xa maphorisa leswaku swi ya konanisiwa,

“Leswi swi talaka ku hi hlamarisa hi leswaku swin’wana swa swichudeni swa xanisiwa hi vanghana  hambi kuri Mindyangu ya swona kumbe vanhu van’wana.Ku tlula kwalaho, swichudeni swin’wana swi boheke ku teka vutihlamuleri byo khathalela vamakwavo lavatsongo, mi kuma leswaku n’wana wa malembe ya 16 kumbe 17 u langutela muti, hikwalaho ka vatswari lava va nga ri ku kona,” Ku ngimeta Khuzwayo.