Mayera Maluleke a Nsimeka Phurojeke Yintshwa eka Malamulele
Meyara wa Masipala wa Collins chabane Shadrack Maluleke u rhangerile nkhuvo wa ku nsimekiwa ka ku akiwa ka switolo leswintshwa swa makete endhawini ya ka Xitlhelani, ekusuhi na ndhawu ya Mabindzu ya Masingita Crossing.
Ku vikiwa leswaku, Kungu leri ri kongomisiwile eka ku nyika va n’wamabindzu va laha kaya ndhawu ya kahle ya ku fambisa Mabindzu ya vona na ku antswisa vutomi bya swirho swa vaaki, ngopfu-ngopfu leswi nga eka Tiwadi ta 23 na 24 ehansi ka Masipala wa Collins Chabane.
Meyara Shadrack Maluleke u kombisile ntshembo wa yena, a vula leswaku, “Tanihi Masipala wa Collins Chabane, hi tshemba leswaku nhluvukiso lowu wu ta tisa nxaxamelo wa mimbuyelo ya nkoka eka vaaki va Collins Chabane,”
“….naswona swi ta ya emahlweni swi antswisa na ku xixima vutomi bya vaxavisi va hina lava nga riki na Miako yo xavisela kona, tanihileswi va tlangaka xiave eku kuriseni ka ikhonomi ya hina ya laha kaya.” Ku engeta Meyara Maluleke.
Switolo leswintshwa swa makete swi ta tirha tanihi ndhawu ya van’wamabindzu vo hambana va laha kaya, ku katsa mabindzu yo fana na tisaloni ta misisi, vaxavisi va mihandzu na matsavu, valunghisi va timovha, tindhawu to xavisa swakudya leswi swekiweke, na swin’wana va ta kuma pulatifomo yo ndlandlamuxa mabindzu ya vona na ku fikelela vaxavi vo tala.
Ku akiwa ka Switolo leswi, a swi [nge] seketeli mabindzu lawa yatsongo ntsena kambe swita tlhela swi hoxa xandla eka ku kula ka ikhonomi ya Masipala.
