Meyara a endzela ndyangu wa mufi Lucky Miyambo

Hi Ntsakisi Gracia Chauke

Meyara wa Masipala wa muganga wa Collins Chabane, Cllr. Shadrack Maluleke hi siku ro sungula ra Mhawuri 2024, u endzerile ndyangu wa Lucky Miyambo loyi a dlayiweke hi ndlela ya tihanyi hi Mugqivela wa ti 27 Mawuwani 2024.

Muehleketeleriwa wa xinuna wa 19 wa malembe hi vukhale wa rixaka ra matiko mambe u khomiwile mayelana na nandzu wo dlaya na ku ringeta ku dlaya emugangeni wa ka Dinga.

Hi ku ya hi xiviko xa maphorisa, muhlaseriwa, munghana wa yena na muehleketeleriwa a va ri exitolo xa ndhawu liya. Munghana wa muhlaseriwa na muehleketeleriwa va vile na ku cincana hi marito laha swi hundzukeke nyimpi. Ku hehliwa leswaku muehleketeleriwa u tlhave munghana loyi hi mukwana eka miri wa le henhla.

Muhlaseriwa u ringetile ku nghenelela, naswona u tlhaveteriwile eka miri wa le henhla. Muehleketeleriwa u tlhele a baleka endzhaku ka sweswo. Muhlaseriwa na munghana va tsutsumerisiwe exibedlhele xa le kusuhi, laha muhlaseriwa a nga hundza emisaveni loko a fika exibedlele hikwalaho ka timbanga ta yena.

Loko swa ha te tano, ntshungu wa vaaki lava hlundzukeke wu hlangeletanile no landzelela muehleketeleriwa laha wu nga n’wi hlasela hi tihanyi, ku kondza a ponisiwa hi maphorisa, kutani a yisiwa exibedlhele na ku rindza maphorisa.

“Tanihi masipala hi vilerisiwa swinene hi rifu ra xitshuketa ra Lucky Miyambo. Timbilu ta hina ti hlundzukile swinene. Kambe hi tlhela hi lava ku kandziyisa leswaku miganga ya hina yi fanele ku tshama yi ri tisenthara ta vuhlayiseki laha vaaki va hina va faneleke ku hanya hi ku rhula handle ko chava naswona leswi swi vula leswaku hinkwerhu hi fanele ku hlanganisa mavoko ku sirhelela miganga ya hina. A hi nge pfumeleli xiyimo lexi swigevenga swi rhendzelekaka swi nghena na ku huma emigangeni ya hina hi ku lava,” ku vula meyara Shadrack Maluleke.

Meyara u tlhele a kombela maphorisa ya Malamulele ku tiyisisa matirhelo ya vona eka tindhawu leti vaaki va hlaseriwaka ngopfu hi swigevenga. “Hi ya emahlweni hi kombela maphorisa ya laha kaya ku ndlandlamuxa ku vonakala ka vona emigangeni ya hina naswona hi khongela no tshemba leswaku voko ra vululami ri ta nyika nxupulo lowukulu eka muehleketeleriwa. Tanihi masipala hi ta va hi seketela ndyangu hiku ku tirhisana na mukhanselara wa muganga ku fikela siku ro hetelela,” ku hlamusela yena.

Swa ha te tano, hi ku ya hi mahungu ndlela ku suka eka vaaki, ku hehliwa leswaku muehleketeleriwa a nga sunguli ku endla nandzu wo dlaya.