Meyera a vulavula na vacheyeri

Hi ntsakisi Gracia chauke

Meyara wa Masipala wa muganga wa Collins Chabane, Cllr Shadrack Maluleke, sweswinyana u rhangele ku simekiwa ka pfhumba ra nguva leyi ya phesaphesa leri tivekaka tanihi Arrive Alive emugangeni wa Nkuzana, etlhelo ka gondzo ra R578. Eka ntirho lowu meyara a joyiniwe hi swirho swa Komiti ya Vulawuri bya Masipala, va xiphorisa na vaofisiri va le magondzweni ku suka eka masipala wa Collins Chabane.

Loko a vulavula eka ku simekiwa ka pfhumba leri hi Ravuntlhanu wa ti 13 N’wendzamhala, meyara Maluleke u komberile vaaki ku va na vuxiyaxiya swinene emagondzweni, ngopfu ngopfu hi nkarhi lowu wa phesaphesa lowu nga tala hi migingiriko. U kandziyisile nkoka wa vuhlayiseki ku hunguta timhangu ta le magondzweni na ku ponisa vutomi.

“Hi lava leswaku vanhu va hina va hlayiseka naswona va teka vuhlayiseki bya vona byi ri bya nkoka. Lowu i nkarhi wo tika wa lembe, laha mindyangu yi tlangelaka ni ku amukela varhandziwa va yona ekaya. Naswona vutomi bya vanhu bya koxeka hikwalaho ka ku chayela hi vusopfa no chayela vanhu va byi cherile. Hikokwalaho hi fanele kuva na vuxiyaxiya,” ku vula yena.

“Hi kombela vachayeri na vafambi hi milenge ku tirhisana na ku va mi landzelela milawu na swipimelo swa le magondzweni. Xikongomelo xa hina i ku sungula lembe ra 2025 ku antswa ku tlula malembe lama hundzeke, no kongomisa eka ku hunguta timhangu.

Meyara u tlhele a tiyisisa vaaki leswaku mfumo wa miganga wu tiyimiserile ku tirhisana swinene na swipano swa ku sindzisa nawu na vuhlayiseki bya le magondzweni ku suka eka mfumo wa xifundzankulu ku tiyisisa ku humelela ka pfhumba. “Leswi hi swi sungulaka namuntlha swi seketela pfhumba ra vuhlayiseki bya le magondzweni ra rixaka, naswona hi tshemba leswaku swi ta pfuna ku hunguta timhangu,” a engetela.

Loko nguva ya makhisimusi yi ri karhi yi tshinela, rungula ra Meyara ri le rivaleni: vuhlayiseki ku sungula, leswaku un’wana na un’wana a ta tiphina hi tiholideyi no sungula lembe lerintshwa hi ndlela leyinene.