David Zitha a xiximiwa
Hi Ntsakisi Gracia Chauke
Khirexe ya Makomba Ndlela ku suka eGiyani B9 yi hundzule nkhuvo wa yona wo thwasisa vana va mune na ntlhanu wa malembe hi vukhale wu va ntirho wo hlawuleka hi ku xixima David Zitha, loyi a tivekaka ngopfu hi vito ra Kokwana Dala. Zitha u xiximiwile hikwalaho ka ku hoxa xandla ka yena lokukulu eka vunyanyuri na nhluvukiso wa vaaki.
Zitha, loyi a davukaka emugangeni wa Jim Nghalalume, i munhu wa titalenta to tala. U tirha tanihi phorisa eka vutomi bya siku na siku, u hlohlotela vanhu eka tindzawulo to hambana hambana, naswona i mukongomisi wa nongonoko [Programme Director] loyi a dumeke swinene. Marito ya yena lama hlohlotelaka ni vurhangeri bya yena swi n’wi endle a rhandziwa hi vanhu vo tala.
Misunguri tlhelo nhloko ya khirexe ya Makomba Ndlela, Mariam Mangolele, hi nkarhi wa wa nkhuvo u vule leswaku: “Kokwana Dala, hi khensa swinene mintirho ya n’wina leyo hlawuleka. Loko hi ku languta, a hi voni munhu loyi a nga ni vuswikoti byo kongomisa minongonoko ntsena. Ku sukela namuntlha, hi ku vona u ri dokodela.”
Zitha u tlhele a tiendlela vito eka bindzu ra vunyanyuri. U tlangile eka minongonoko ya TV leyi tivekaka yo fana na Muvhango, Isidingo, na Giyani: Land of Blood, naswona u tirhile tanihi muhaxi wa xiyanimoya eka GCR. Ku engetela kwalaho, u tshame a bukutela masagwadi ya ku va muhaxi wa kahle wa xiyanimoya na TV/MC, kasi lebyi ko va vumbhoni bya vuswikoti bya yena na ku tinyiketela.
Loko a vulavula na Nthavela, Zitha u vule leswaku, “A ndzi nga langutelanga ku xiximiwa loku, kambe ndzi khensile swinene. A swo va xikombiso xa kahle lexi kombisaka leswaku vaaki va swi teka swi ri swa nkoka leswi ndzi swi endlaka. Xitsonga xi ri: “swi teka tiko kumbe muganga ku kurisa n’wana,” naswona ndzi tsakile ku va xiphemu xa muganga lowu.”
Nkhuvo lowu a wu tele hi ntsako ni ku tlangela tanihi loko Zitha a amukela ku xiximiwa ka yena. A ku ri xitsundzuxo xa matimba xa nkoka wo lemuka lava va hlohlotelaka ni ku tlakusa miganga ya vona. Xitori xa Zitha i vumbhoni bya leswaku ku tirha hi matimba na ku tinyiketela swi nga siya nkucetelo lowu nga heriki eka vanhu lava u hanyaka na vona.
