Ridder a nyikiwa beyili
Hi Orlando Chauke
Ridder Solomon Mathebula, loyi a hehliwaka hi ku yiva no dlaya tihomu ta khume nharhu emugangeni wa Mashavele, u nyikiwile beyili ya R10,000 hi khoto ya majistarata ya Giyani hi Ravuntlhanu. A languteriwa ku tlhela a ya ekhoto hi siku ra vukhume ra nhweti leyi, loko nandzu wa yena na wa vahehliwa kulobye, Bernado Phosa na Denis Masonto, swi nga endleka wu yisiwa ekhoto ya xifundzha.
Mathebula loyi a tivekaka tanihi “Ridder” hi van’wamapurasi va ndhawu liya, ari eku balekeni kusukela hi ti 22 ta Ndzhati 2023, loko ku kumiwile 13 wa tihomu leti dlayiweke e garaji ya yena emugangeni wa Mashavele. Ku hehliwa leswaku yena na vahehliwa kulobye va balekile, va siya nyama.
Vahehliwa kulobye va khomiwile khale va tlhela va ntshuxiwa hi beyili ya R20,000 ha wun’we, kambe Ridder, loyi ku tshembiwaka leswaku hi yena a nga muluki wa mano, u khomiwile ntsena hi ti 21 ta Dzivamisoko lembe leri. U tshamile ekhotsweni ku kondza a nyikiwa beyili hi Ravuntlhanu wa ti 6 N’wendzamhala. Ekusunguleni, Ridder u arile ku endla xikombelo xa beyili, hiku chavela vutomi bya yena hikokwalaho ka vukarhi bya van’wamapurasi va ndhawu liya, kambe u cince miehleketo endzhaku ko heta tin’hweti ekhotsweni
Van’wamapurasi vo tala a va nga tsakanga hi xiboho xa khoto xo ntshuxa Ridder hi beyili. A va ye eka mintshamo ya le khoto ku sukela loko a khomiwile, va ri ni ntshembo wa leswaku vukona bya vona byi ta khorwisa majisitarata leswaku a n’wi pfalela ekhotsweni.
James Shimange, mutshamaxitulu wa foramu ya van’wamapurasi va swifuwo emugangeni wa Dzumeri, u vule leswaku va khunguvanyekile kambe va xixima xiboho xa khoto. Kambe u tsundzuxile leswaku a va nge tiyisekisi vuhlayiseki bya Ridder ehandle ka khotso. U vule leswaku: “Vanhu va ha hlundzukile naswona va nga ha lava ku rihisela.”
Shimange u tlhele a boxa leswaku Ridder i mudyohi wo phindha-phindha naswona u nghene ekhotsweni na ku huma ekhotsweni hikwalaho ka vugevenga byo fana na lebyi. U kombisile leswaku un’wana wa vahehliwa kulobye va Ridder, Bernado Phosa, loyi a ntshuxiweke hi beyili khale, se u khomiwile nakambe eka nandzu wun’wana wo yiva swifuwo. U vule leswaku: “Leswi a swi amukeleki eka hina tanihi van’wamapurasi.”
A ku na ku tiyisisiwa ku fikela sweswi mayelana na ku khomiwa lokuntshwa ka Phosa hi ku yiva swifuwo.
