Vanhu vambirhi va kuma xigwevo xa vutomi
Hi Orlando Chauke
Khoto ya majistarata ya Giyani, hi Ravunharhu wa ti 27 Hukuri 2024, yi gweve n’wini wa thavhene wa malembe ya 46 hi vukhale wo huma emugangeni wa Sifasonke, Tinyiko Kenneth Hlungwani, na muhehliwa kulobye, Tinyiko Solly Sithole (44), ku tshama ekhotsweni vutomi hinkwabyo hikwalaho ko dlaya hi tihanyi vavanuna vambirhi lava va hehleke hi ku phanga hi lembe ra 2017.
Khoto yi twe leswaku hi Mugqivela wa ti 26 Khotavuxika 2017, mphikizano wa pool (snooker) a wu ri karhi wu endleka eka endhawu ya vuhangaselo emugangeni wa Sifasonke. Mphikizano lowu wu vile na vatlangi vo huma emugangeni wa Jim na Nkurhi Sifasonke. Hi nkarhi wa ntlangu, ku vikiwa leswaku un’wana wa vatlangi u sukile a ya teka jazi tanihi leswi a twa ku titimela. Loko a tlhelela ethavhene, u phangheriwile hi vaehleketeleriwa vambirhi lava nga yiva mali ya yena na riqingho-nyonga
Loko a ri ethavhene, muhlaseriwa u vike ku phanga loku eka n’wini wa thavhene. N’wini wa tavern, kun’we na ntlawa wa vanhu lava a va ri kona, va tshinelele vanhu vanharhu lava humaka emugangeni wa Jim, va va hehla hi ku va va ri na xandla eka ku phanga na ku va hlasela loko va ri endzeni ka ndhawu ya vuhungaselo.
Endzhakunyana ntlawa lowu wu yise vahlaseriwa endhawini ya rivala ra mintlangu ra le kusuhi swin’we ni minkwama ya vona. Un’wana wa vahlaseriwa u swi kotile ku baleka kutani a hlalela ku hlaseriwa loku a ri ekule. N’wini wa thavhene ni vatlangi va seche swikhwama swa vahlaseriwa vambirhi lava saleke kutani va kuma matlhari lama nga ni khombo, ku katsa na Banga ni mikwana. Kutani matlhari lawa ya tirhisiwile ku tsema swirho swa vahlaseriwa, ku tsema tintiho ni swikunwana swa vona ni ku va tlhavetela.
Maphorisa ya vitaniwile endhawini ya mhangu, kambe loko ya fika, swirho swa vaaki swi balekile hi matlhelo yo hambana, hi ku chava ku khomiwa mayelana na nhlaselo lowu. Vahlaseriwa, Floyd Manganyi (21) na Tshembho Nicholas Makhubela (33) endzhaku va yisiwe exibedlhele xa Nkhensani.
Khombo ra kona, Floyd Manganyi u lovile hi ku vaviseka loku loko a fika exibedlhele, kasi Tshembho Nicholas Makhubela u hundziseriwe exibedlhele xin’wana, laha a nga hundza emisaveni endzhaku ka mavhiki mambirhi. Nandzu wa ku hlasela hi xikongomelo xo vavisa miri a wu pfuruwile endzhaku ka sweswo wu ndlandlamuxiwile ku va nandzu wo dlaya.
Phorisa ra vulavisisi Rosemary Ntota u endle vulavisisi kutani a khoma vaehleketeleriwa lavambirhi endzhaku ka vhiki endzhaku ka mhangu leyi. Hi nkarhi wa vulavisisi, vamangaleriwa va nyikiwile beyili.
Khomixinara wa maphorisa wa xifundzhankulu, Lieutenant General Thembi Hadebe, ku vuriwa leswaku u amukerile xigwevo lexi naswona u bumabumerile muofisiri wa vulavisisi eka ntirho wa yena wo tikarhata.
