Giyani yi hlaseriwa hi timpfula ta matimba

Hi Orlando Chauke

Vaaki vo tala va sale va pfilunganyekile endzhaku ka ku dzindza ka tilu na mimoya ya matimba leyi hungeke hi Sonto wa ti 27 Hlungula 2024 nimadyambu, leswi vangeke ku timeka ka gezi naswona swi siyeke tindlu to tala ti hahlukile, ni mirhi leyi weke ni tintambhu ta gezi leti a ti hangalakile eswitarateni hinkwaswo.

Maxelo lawa yo biha ya vange ku timeka ka gezi eka tindhawu to tala no siya magidi ya vaaki va Giyani exinyamini. Mimoya na timpfula ta matimba swi hahlule malwangu ya tindlu ta vanhu no onha tintambu ta gezi, leswi endleke leswaku kuva na thyaka ro tala leri hangalakeke emagondzweni ni le switarateni leswi rhendzeleke Giyani.

Gondzo ra R529 ekusuhi na muganga wa Bambeni akuri rin’wana ra magondzo lawa a ya khumbhekile, tanihi leswi murhi lowukulu a wu wele egondzweni, no endla leswaku ndhawu liya yi nga fambeki ku ringana nkarhinyana ku kondza loko yi basisiwile.

Vukorhokeri bya xihatla byi hlamule hi ku hatlisa, byi tirha hi matimba ku basisa magondzo lama pfaleriweke hinkwako-nkwako endzeni ka

masipala, ku katsa na ku lulamisiwa ka tintambhu ta gezi.

Hambileswi vukorhokeri bya xihatla byi ngheneleke ku basisa magondzo ni ku lunghisa switirhisiwa swa gezi, mpimo wa ku onhaka wu endle leswaku swi tika ku vuyisela ntolovelo tanihi leswi vanhu vo tala va pfumaleke gezi ku tlula masiku manharhu ku sukela hi Sonto nimadyambu, leswi khumbeke vutomi bya vona bya siku na siku na ku fikelela vukorhokeri bya nkoka.

“Hi na masiku manharhu hi nga ri na gezi sweswi. Xana va langutele leswaku hi hanya njhani handle ka gezi?” ku vutisa David Mabunda, muaki wa muganga wa Siyandhani eGiyani.

Mabunda u kombisile ku vilela hi ku timeka ka gezi loku tekeke nkarhi wo leha, a kombisa ku nonoka loku

vaaki va langutaneke na kona eku hlayiseni ka swilaveko swa xisekelo na ndlela leyi ku pfumaleka ka swintshuxo ku suka eka

valawuri swi va siyeke va titwa va honisiwile.

“Swakudya swa hina swi sungula ku onhaka eka xigwitsirisi; hi lava ntsena ku tiva leswaku leswi swi ta lulamisiwa rini,” a engetela. A vulavula hi ku yimela vo tala eka muganga wa ka vona lava na vona a va ri eku karhatekeni.

Loko a vutiswa hi mpimo wa ku onhaka eka masipala wa GGM, Steve Mavunda, muvulavuleri wa masipala, u vule leswaku kwalomu ka muganga wun’wana na wun’wana eGiyani wu khumbekile hi maxelo lawa.

U vule leswaku mpimo lowu heleleke wa ku onhaka loku vangiweke hi timpfula ta matimba na mimoya i wu kulu swinene naswona vanhu vo tala se a va vike ku onhaka ka tindhawu ta vona.

“Vaaki vo tala ku suka eka tindhawu to hambana hambana eGiyani va tile ku ta vika hi xitalo

ku lahlekeriwa hi nhundzu,” u vurile, a hlohlotela lava khumbekaka ku teka magoza ya vuhlayiseki lama lavekaka ku tiyisisa vuhlayiseki bya vona. “Loko hi vulavula hi Dzumeri ntsena, kuya hi mukhanselara wa wadi eka ndhawu leyi mindyangu leyi tlulaka madzana ya ntlhanu yi hlaseriwile hi timpfula ta matimba na mimoya,” ku vula yena.