Jaha Ri Pfumela Nandzu wa Ku Dlaya muhlekisana wa rona

Maphorisa eGiyani ya sungurile vulavisisi bya ku dlaya endzhaku ka loko ntsumbu wa Nyikiwe Maranda Chauke wa malembe ya makume mbirhi n’we wu kumiwile eka swihlahla swa le kusuhi emugangeni wa Gawula hi Ravumune, Sunguti 11, 2024.

Muehleketeleriwa loyi a tivekaka tani hi muaki wa makume mbirhi mune wa malembe hi vukhale wa muganga lowu fanaka naswona ku vikiwa leswaku i muhlekisana wa mufi, u ti nyikerile eka Community Services Center (CSC) exitichini xa maphorisa ku ya vika hi vugevenga lebyi a byi endleke.

Kuya hi Muvulavuleri wa maphorisa ya Giyani Ridgewell Rikhotso, muehleketeleriwa u nyikile maphorisa tinomboro to tihlanganisa na mbhoni leyi voneke mhangu leyi loko yi humelela kutani a pfumela ku va kongomisa eka ndzhawu leyi mhangu yi nga humelela kona.

“Maphorisa ya vitanile K-9 Unit hi ku copeta ka tihlo, naswona va heleketiwile laha mhangu yi nga humelela kona hi mbhoni, naswona ntlawa lowu wa k-9 wu kumile ntsumbu wa muhlaseriwa endhawini ya mhangu,” ku vula Rikhotso.

Loko nsusumeto lowu wu nga endla leswaku muehleketeleriwa a teka xiboho xo dlaya wu nga si tiveka, Muvulavuleri wa maphorisa ya Giyani Sejeni Rikhotso u kombisile leswaku Maphorisa ya ehleketelela madzolonga ya le mindyangwini.

Muehleketeleriwa u languteriwile ku ya emahlweni ka khoto ya majistarata ya Giyani hi Musumbhunuku, ti 15 ta Ndzhati 2024.