Giyani Vipers yi hlula
Hi Orlando Chauke
Giyani Vipers yi tlhele yi kombisa matimba ma yona hi ku hlula eka Greater Giyani Netball Trophy ra vumune ku sukela hi lembe ra 2017. Xipano lexi xi hlurile naswona xi amukele sagwadi ra mali ya R16,600 na gere ya mintlangu endzhaku ko hlula Mapuve Sunshine hi 23-14 ekhoto ya thenisi eGiyani hi Mugqivela hi nkarhi wa mphikizano wa Khapu ya Meyara ya Netball.
Hambiswiritano, muzaberi, Tryphina Mabunda, loyi a tivekaka hi vito ra Mama-Try, a nga tsakanga hi ku helela hi matirhelo ya xipano, hambileswi va nga hlula eka ntlangu lowu. “A va nga funghi ndlela leyi a va fanele va yi fungha ha yona. A va tsekatsekanyana, naswona vakori va amukerile tibolo kambe va tsandzekile ku howisa tigoli,” ku vula yena.
“Loko a va tlangile hi ndlela leyi va tlangeke ha yona vhiki leri nga hundza, a hi ta va hi hlule hi ku hambana lokukulu,” u ye emahlweni, a amukela matirhelo yo hlamarisa ya xipano lexi a va tlanga na xona, na ku va hlohlotela ku tilulamisela ku antswa nkarhi lowu taka. “Hi na malembe yo tala hi ri karhi hi hlula khapu leyi, hikwalaho a swa ha enerisi. Hi lava xipano lexi nga ta hi susa eka mphikizano,” ku vula yena.
Hi nkarhi lowu fanaka, Mapuve Sunshine, leyi tshembisiweke riendzo ro ya eKruger National Park hi mukhanselara wa wadi ya vona na muzaberi, Erick Makondo, loko va hlula eka mphikizano lowu, a va tekanga ku lahlekeriwa loku hi ku olova. Vatlangi vo tala va rile hi ku pfilunganyeka loko va swi vona leswaku va hluriwile eka ntlangu lowu, leswi endleke leswaku mukhanselara wa vona wa wadi a nghenelela a va khongotela.
“Mi nga vileli hi ku lahlekeriwa; hi tlhelo rin’wana mi tinhenha. A mi nga tlangi na tintangha ta n’wina hi malembe, naswona hambi swi ri tano, mi kombisile matirhelo ya kahle swinene,” u va tiyisisile, a engetela leswaku wa ha ta va yisa eKruger. “ A ku na lexi nga ndzi sivelaka ku mi yisa eKruger endzhaku ka matirhelo ya n’wina,” a vula.
Milawu ya mphikizano wa netball a yi lava leswaku xipano xin’wana na xin’wana xi vumbiwa hi vatlangi va kwalomu ka mune lava nga ehansi ka malembe ya 21 na ku fika eka vatlangi vanharhu lava nga ehenhla ka malembe ya 21 loko swi koteka. Xipano xa netball xa Mapuve xi tlangile na vatlangi hinkwavo lavatsongo va malembe ya le xikarhi ka 13 na 17, kasi Giyani Vipers a yi ri na vatlangi vanharhu lavakulu lava a va ri na malembe yo tlula 21, van’wana va vona a va ri vatlangi va netball va xiphurofexinali lava nga na ntokoto.
Ku nga khathariseki swiphiqo leswi a va langutane na swona, va veke matirhelo yo hlamarisa, va howisa tigoli to sungula. Hambiswiritano, Vipers yi tlhele yi lawula xiyimo kutani yi sungula ku lwa hi matimba.
Hambi leswi Mapuve Sunshine yi ringeteke ku tiyisela no langutana na xipano lexi a va phikizana na xona. Eku heteleleni, Vipers yi humelerile yi hlula, yi amukela sagwadi ra le henhla. Hambi swi ri tano, Mapuve Sunshine yi yile ekaya na sagwadi ra mali ya R12,600 na gere ya netball.
