Ward 21 yi wina sagwadi ra le henhla
Hi Orlando Chauke
“A hi vuswikoti byo tlanga ntlangu ntsena, kambe maqhinga lawa munhu a ma tirhisaka ku wu hlula,” ku hlamusela Musa Chauke, muzaberi wa xipano xa bolo ya milenge xa vavanuna xa Ward 21, endzhaku ka ku hlula ka vona hi 2-1 eka Ward 13 ku suka eka Section-F eka Mphikizano wa Khapu ya Meyara hi Mugqivela erivaleni ra mintlangu ra Giyani.
Chauke u hlamuserile leswaku va dyondze hi mintlangu ya xipano xa Ward 13 ya khale naswona a va swi tiva kahle leswaku va nga va hlula njhani. “A hi swi tiva leswaku va tiyile naswona a hi nge swi koti ku fambisana na xitayele xa vona xo tlanga, kutani hi tumbuluxe maqhinga yo hlula: ku kongomisa eka vusirheleri na ku rhumela vatlangi vambirhi ntsena emahlweni ku ya hlasela.
“Eka minkarhi yo hlaya, a hi cincana exikarhi ka xivumbeko xa 4-5-1 na 4-4-2 hikuva a hi nga lavi ku siya vusirheleri bya hina byi paluxiwile hi ku rhumela vatlangi vo tala emahlweni,” u hlamuserile, a pfumela leswaku vona a va tlanga na xin’wana xa swipano swo tika swinene eka mphikizano lowu.
“Xipano xa yena xi amukerile sagwadi ra mali ya R25,000 ku katsa na gere kumbe jesi ra bolo ya milenge, kasi xipano lexi hluriweke xi amukele R19,100 na na gere na xona. Loko va vutisiwa leswaku va kunguhata ku endla yini hi mali ya masagwadi, Chauke u kombisile leswaku,” yi ta tirhisiwa ku seketela swilaveko swa xipano.
“Eka hina, a hi mhaka ya mali ngopfu kambe i mhaka ya nhluvukiso wa vatlangi lavatsongo. Loko a wu hlalele xipano xa hina xi tlanga, a wu ta va u xiye leswaku vatlangi va hina hinkwavo a va ri ehansi ka malembe ya 21. Kutani mali leyi yi ta tirhisiwa ku xava switirhisiwa swa xipano na swin’wana leswi lavekaka leswi hoxaka xandla eka nhluvukiso wa vatlangi lava.” Ku hlamusela Chauke.
Hi nkarhi wolowo, eka bolo ya milenge ya va xinsati, sagwadi ra le henhla ri yile eka Mninginisi Brave Ladies endzhaku ka ku hlula hi 4-2 eka ti penati loko va hlangana na Sekhunyane Blue Birds FC. Leswi swi landzerile ku tlanga hi 3-3 exikarhi ka swipano leswimbirhi, leswi nga endla leswaku ku va na penati. Mninginisi Brave Ladies yi hetelele yi teke sagwadi ra le henhla ra R18,100 ku katsa na gere ya bolo ya milenge, kasi Blue Birds yi amukele R14,100 xikan’we na gere ya bolo ya milenge.
Loko a vulavula hi ku hlula loku, muzaberi wa Mninginisi Brave Ladies’, Tiyiselani Mdluli, u hoyozerile xipano xa yena ku va xi hlurile eka mphikizano lowu naswona u boxe leswaku mali ya masagwadi yi ta va pfuna ku xava tintanghu ta bolo ya milenge. “I ntiyiso, hi ta va na nkhuvo nyana, kambe mali yo tala yi ta ya eka ku kuma tintanghu ta bolo ya milenge ya xipano xa hina,” a hlamusela.
Meyara wa Greater Giyani, Thandi Zitha, u hoyozerile vahluri hinkwavo na ku tivisa ku nghenisiwa ka tikhodi to engetela ta mintlangu leti nga ta va xiphemu xa Khapu ya Meyara lembe leri taka. “Xikongomelo xa hina tani hi masipala i ku hluvukisa mintlangu exikarhi ka vantshwa loko hi ri karhi hi tlhela hi nyika vuhungasi lebyi va susaka eswitarateni. Hi yona mhaka leyi hi nghenisaka tikhodi tintshwa ta mintlangu eka Khapu ya Meyara lembe leri taka,” ku vula yena. Tikhodi letintshwa ta mintlangu ti ta katsa thenisi, rugby, volleyball, khirikhete na golf.
