Wansati lontsongo a tisa swakudya swa xintu

Wansati lontsongo a tisa swakudya swa xintu

Hi Orlando Chauke

Khamphani leyi nga ya wansati ePhalaborwa yi rhangela pfhumba ro tisa swakudya swa ndzhavuko wa Afrika eka makete wa misava hinkwayo. Wendy Ntimbani-Vesela, n’wamabindzu lontsongo kusuka ePhalaborwa, u tile na miehleketo yo tirhisa swakudya swa xintu leswi kumekaka laha kaya ku tumbuluxa swixavisiwa leswinga kombisiwaka eka makete wa misava hinkwayo.

U simeke khamphani leyi vitaniwaka Matomani, leyi thyiweke vito ra Matomani lawa ya hanyaka ngopfu eka misinya ya mopani naswona hikokwalaho ka sweswo ya tiveka tanihi ‘Mopani worms’. Matomani lawa, lawa ya tivekaka hi nhlayo yale henhla ya ti ‘protein’, ya dyiwa ngopfu hi vanhu votala eka xifundzhantsongo xa Mopani nale ka tindzhawu tin’wana ta tiko hi nguva ya ximumu loko matluka yakona yava ya rihlaza.

Wendy u hundzule Matomani lawa ya kumekaka mahala ya va swilo swa nkoka leswi sweswi a swi xavisaka eka inthanete. “Hi tirhisa Matomani ku tumbuluxa swakudya leswi fuweke hi ti ‘protein’ leswi nga na rihanyo eka vaaki va hina. Swixavisiwa swa hina swi katsa ti Mopani crackers, Mopani flour, na Mopani protein bars,” ku vula Cindy Ntimbani, Mupfuni wa Vufambisi bya Matirhelo eka Matomani.

Khamphani leyi yi simekiwile hi Nyenyankulu 2022 hi xikongomelonkulu xo endla leswaku swakudya swa laha kaya swi fikeleleka eka makete wo anama. “Swakudya swo tala swa ndzhavuko wa Afrika-Dzonga a swi fikeleleki hi ku olova, kutani loko hi sungula khamphani, xikongomelo xa hina a ku ri ku hlanganisa xivandla xexo hi ku endla leswaku swakudya swa ndhavuko swi kumeka etikweni hinkwaro,” ku vula yena.

Loko a hlamusela miehleketo ya ku tumbuluxiwa ka ti Mopani worm energy bars, Cindy u vule leswaku a va lava swakudya leswi nga ta nghena eka makete wa ti ‘protein’. “Matomani ya na kwalomu ka 60% wa ti ‘protein’, hikokwalaho hi langutile eka makete wa ti ‘protein’ ku kuma swakudya swa ti ‘protein’ leswi xavisiwaka ngopfu, naswona protein bar akuri yin’wana ya swona,” a hlamusela.

Cindy u hlamuserile leswaku va xavisa switirhisiwa swa vona eka inthanete eka tiwebusayiti to fana na Takealot, Zulzi na Cape Union Mart. “Hambi u le Joni kumbe eKapa, u nga enerisa ku navela ka wena hi ku olova hi ku xava eka yin’wana na yin’wana ya tiwebusayiti leti hi xaviselaka eka tona,” u vurile, a engetela leswaku ku navela ka khamphani a ku ri “ku va na swakudya leswi endliweke hi Matomani leswi kumekaka eka etikweni ni le misaveni hinkwayo.”

Feme ya khamphani leyi yi kumeka eRivaleni ra Swihahampfhuka ra Phalaborwa, kasi tihofisi ta yona letikulu ti le eJoni. Ku kuma vuxokoxoko byo tala mayelana na swixavisiwa, u nga tihlanganisa na khamphani eka 067 641 2139 kumbe u endzela www.matomani.com. U nga tlhela u va landzelela eka tipulatifomo ta swiyenge swa mabulo swo fana na Facebook, Instagram, na Twitter eka @Matomani.