Khamphasi ya TUT yi languteriwa ku tirha haxawa

Hi Orlando Chauke

Masipala wa Greater Giyani wu nga va na khamphasi ya yunivhesiti hiku hatlisa kutlula leswi aswi languteriwile loko makungu ya holobyenkulu Dr Phophi Ramathuba yo humelela. Hi Ravuntlhanu, Holobyenkulu u endzerile khale ka Kholichi ya Dyondzo ya Giyani ku kambela xiyimo xa switirhisiwa swa yona.

Mukhanselara Thamsanqa Mabunda, loyi a rhangelaka nhluvukiso wa switirhisiwa eka masipala wa Greater Giyani, u tivise Holobyenkulu hi nhluvuko lowu endliwaka na Yunivhesiti ya Thekinoloji ya Tshwane (TUT). U hlamuserile leswaku masipala na yunivhesiti va tirhisana ku hatlisisa endlelo ro pfula khamphasi.

“TUT na masipala va tirha hi ku hiseka ku fikelela swilaveko leswi lavekaka leswaku ndhawu leyi yi faneleka tanihi khamphasi, ku fana na ku tiyisisa mphakelo wa mati lowu tshembekaka na swin’wana,” ku vula Mabunda, a engetela leswaku u khoma minkanerisano ya n’hweti na n’hweti na yunivhesiti.

Loko a angula, Holobyenkulu u komberile masipala ku rhangisa emahlweni ku nyika yunivhesiti mpfumelelo wo nghena eka ndhawu leyi loko endlelo ro tsarisa ra ximfumo ra ha ya emahlweni. “Sweswinyana ndzi vile na nhlengeletano na ntlawa wa TUT lowu a wu rhangela hi Vice-Chancellor, naswona hi endlile ku tinyiketela leswaku masipala wu ta va tsalela papila leri nyikaka mpfumelelo wo sungula matirhelo. A hi lavi ku yimela endlelo hinkwaro ro tsarisa, tanihileswi sweswo swi nga ha tekaka nkarhi wo leha.

“Hi pfumelelanile leswaku khamphasi yi fanele ku sungula ku tirha ku sukela lembe leri taka, hambiloko yi nga sunguli ku tirha hi ku hetiseka, hikuva ka ha ri na swilo swo tala leswi faneleke ku hetiwa. Hambiswiritano, va fanele ku sungula hi tikhoso to karhi,” ku vula Ramathuba.

Holobyenkulu u vule leswaku hi ku ya emahlweni na makungu lawa, “mfumo wu ta va wu nyika ntshembo eka vanhu va Giyani leswaku hakunene khamphasi leyi yi ta tirhisiwa tanihi yunivhesiti.” U tlhele a kandziyisa leswaku ku pfuriwa ka khamphasi swi ta tlakusa swinene migingiriko ya ikhonomi eGiyani na xifundzhantsongo hinkwaxo xa Mopani.

“Mi ta pfumelelana na mina, tanihilaha Meyarankulu a vuleke hakona, leswaku ikhonomi ya Giyani na xifundzantsongo hinkwaxo yi nga humelela loko kholichi leyi yi hundzuriwa khamphasi ya yunivhesiti,” u engeterile, a hlohlotela vaaki va Giyani ku papalata ku tshama eka ndhawu leyi swi nga ri enawini loko va ha ri karhi va yi lunghiselela xiphemu xa yona lexintshwa.

“Hi kombela wun’wana ni wun’wana endhawini ya Giyani, ngopfu-ngopfu lava nga ha vaka va ehleketa ku tshama endhawini leyi swi nga ri enawini, leswaku va fambela ekule. Ndhawu leyi yi vekeriwe nchumu lowu nga ta vuyerisa vanhu vo tala. A hi lavi leswaku vana va hina va boheka ku famba mpfhuka wo leha ku ya kuma dyondzo ya le yunivhesiti loko hi ri na xitirhisiwa laha xi nga tirhisiwaka kahle,” ku vula yena.