Golden City Yi Hlula Blue Birds hi 2-1
Hi Orlando Chauke
Xipano xa Golden City FC ku suka emugangeni wa Siyandhani xi sungurile nguva ya xona ya Giyani Promotional League Stream-A kahle tanihi loko xi hlurile hi 2-1 loko xi hlangana na Blue Birds ku suka emugangeni wa Sekhunyane hi Sonto.
Ntlangu lowu, lowu a wu tlangiwa ekaya ka xipano xa Golden City, a wu ri wukulu ku sukela eku sunguleni loko swipano leswimbirhi swi ri karhi swi hlaselana hi matimba. Golden City yi howise goli ro sungula ku nga si hela kotara yo sungula , yi tsakisa no nyanyula vaseketeri va yona.
Eka kotara ya vumbirhi, Blue Birds yi hatle howisa goli laha tinga ombana hi 1-1 naswona yi teke vulawuri bya ntlangu hiku hlasela ko tala. A ku lo sala ka ntsongo Blue Birds yi rhangele ntlangu kambe n’watipala wa Golden City a ri ku tirheni hi matimba ku sivela ku howisiwa ka ti goli hi Blue Birds.
Hambi leswi a yi ri ehansi ka ntshikilelo, Golden City yi kotile ku howisa goli endzhaku ka nkarhi, yi tiyisisa ku hlula hi 2-1. Ku hlula loku ku va nyikile masungulo yo tiya eka ligi, kasi Blue Birds yi kumile xichavo eka matirhelo ya yona naswona yi ta kongomisa ku tirha ku antswa eka ntlangu wa yona lowu landzelaka.