Winners Park yi hluriwa
Hi Orlando Chauke
Na loko ntlangu wu nga se sungula, a swi ri rivaleni leswaku xipano xa Winners Park lexi xi humaka endhawini ya Bellevue xi ta hluriwa hi xipano xa ndhuma xa le Makhado, Mpheni Home Defenders. Hambi swi ri tano, leswi a xi ri kaya, a swi tshembhisa leswaku Winners Park yi ta tikombisa vu yona, hukuva matimba ya ngwenya i mati.Ku sukela eku sunguleni, Winners Park a yi ri na xiphiqo xo hlayisa bolo na swona minhlaselo ya vona a yi nga tshamisekanga. Vatlangi va vona va le mahlweni a va koka milenge, leswi siyeke vasirheleri na n’watipala wa vona va tshama va ri karhi va hlaseriwa.
hi tlhelo rin’wana, Mpheni Home Defenders a yi lawula ntlangu naswona a yi tshamela ro hlasela. A swi tekanga nkarhi wo leha leswaku yi howisa goli kutani yi rhangela hi 1-0, loko swa ha te tano, yi tlhele yi howisa yinwana goli hi penati leswi nga endla leswaku yi rhanga emahlweni hi 2-0. Leswi Winners Park a yi vonaka yi tsekatseka, Mpheni yi yise emahlweni nhlaselo wa yona. Loko ntlangu wu ya emahlweni ku ya fika eka kotara ya vumbirhi, Mpheni Home Defenders a yi kombisanga tintswalo.
Va hlayise ndlela ya vona yo tlanga ya tihanyi, va hlula Winners Park leyi se a yi ri eku tsandzekeni. Ku nga si hela nkarhi wo koma, Mpheni yi tlhele yi howisa tigoli timbirhi, leswi endleke leswaku yi hlula hi 4-0 na swona yi siye varhandzi va xipano xa Winners Park va khunguvanyekile.
Ku vilela exikarhi ka vaseketeri va Winners Park ku kurile, laha vo tala va kongomiseke vukarhi bya vona eka mudzaberi. Vaseketeri va sungule ku humesa ku nga eneriseki ka vona, va kanakana ku hlawuriwa ka xipano na ku cinciwa ka xipano. Van’wana va tlakuse mavoko ya vona hi xiendlo xo siva, kasi van’wana va huwelerile va ku “Rover! Rover! Rover!”—va kombela ku katsa muhlaseri loyi a tivekaka swinene loyi a tshikiwile ehandle ka xipano.
Hambiswiritano, a ku nga ri na nchumu lowu mudzaberi a ta wu endla hi nkarhi wolowo. Leswi xipano xa yena a xi sale endzhaku hi magoza ya mune, ntlangu se a wu languteka wu lahlekile eka vona, ku nga khathariseki leswaku u nghenise mutlangi wihi erivaleni. Hambileswi xipano xi hluriweke, mudzaberi wa Winners Park u tirhile hi ku hiseka, a sivela ku howisiwa ka tigoli to hlaya nyana leswi a swi ta nyanya ku khomisa tingana swinene. Kambe matshalatshala ya yena a ya nga pfuni nchumu, tanihi leswi vatlangi a va koka milenge.
Ku lahlekeriwa loku a ku kombisanga ntsena ku tsana ka xipano kambe ku tlhele ku tlakusa ku vilela hi swiboho swa tindlela na ku hlawuriwa ka vatlangi. Loko va tshemba ku tshama eka ligi nkarhinyana, ku cinca ka xihatla ku ta laveka ku pfuxeta xipano naswona kumbexana ku vuyisa khale ka vatlangi lava endlike leswaku xipano xa Winners Park xi xiximiwa eka nguva leyi nga hundza.
Handle ka sweswo, vumundzuku bya vona a byi languteki byi ri lebyinene ngopfu. Naswona lexi hi xona ntsena xipano lexi varhandzi va bolo ya milenge va Giyani va xi tshembaka endzhaku ka loko Emanuel FC yi xavise xiyimo xa yona naswona xipano xin’wana, Giyani Happy Boys, xi tsandzekile ku tlhelela eka ligi.
