Bolo ya milenge yi khumba rihanyo ra vadyuhari
Hi Ntsakisi Gracia Chauke
Vandla ra African National Congress eka xifundzantsongo xa Vhembe a ri khomile mphikizano wa bolo ya milenge hi mahelo ya vhiki leri nga hundza, erivaleni ra mintlangu ra Malamulele ehansi ka masipala wa muganga wa Collins Chabane.
Mphikizano lowu a wu ri wo hlawuleka swinene tani hi leswi a ku phikizana swipano swa vadyuhari. Swipano swa nhlayo ya 79 a swi nghenelerile ku sukela loko mphikizano wu tava wu sungurile.
kasi 30 wa swipano leswi nga ringanela ku ya eka ‘quarterfinals’ hinkwaswo swi nyikiwile switirhisiwa swa bolo ya milenge leswintshwa ni tibolo. Kasi Magona FC na Xigamani FC va nyikiwile timendlele ta ‘bronze’, swidlodlo, tigerhe timbirhi letintshwa ta bolo ya milenge ni tibolo timbirhi.
Meyara wa masipala wa Collins Chabane, Shadrack Maluleke u nyikile masagwadi eka swipano swa bolo ya milenge leswi tirheke kahle laha a nga tivisa xipano xa Xigamani FC tani hi xipano lexi nga hlula mphikizano endzhaku ko hlula Magona FC eka ti ‘finals’.
“Matshalatshala ya ANC yo tlakusa nhluvukiso wa mintlangu na ku nghenelela ka vaaki ya bumabumeriwile ku va ya humelerile, laha mphikizano wu amukeleke mbuyelo lowunene ku suka eka vatekaxiave na vahlaleri,” ku vula meyara Maluleke. Kasi leswi swi languteka swi ri kungu ra kahle swinene tani hi leswi swi tlangaka xiave xa nkoka eka rihanyo ra vadyuhari.
Vuyelo bya bolo ya milenge eka rihanyo ra vadyuhari byi dzikile naswona byi na swiyenge swo tala. Ku suka eka ku ndlandlamuxa rihanyo ra miri na ku tlakusa vuhlayiseki bya miehleketo, bolo ya milenge yi nyika endlelo ro angarhela ro antswisa khwalithi ya vutomi bya vadyuhari.
Kasi i swa nkoka ku hlohlotela vadyuhari ku nghenelela eka bolo ya milenge tani hi leswi swi nga na vuyelo lebyinene byo fana na ku dyuhala loku hanyeke kahle, ku tsaka, na ku va ni matimba. Ku tlakusa mintlangu na ku endla vutiolori eka vanhu lavakulu lava dyuhaleke swi fanele ku va nchumu wa nkoka eka rihanyo ra vaaki.
