Ku tumbuluxiwa xipano

Hi Ntsakisi Gracia Chauke

Xipano lexintshwa xa bolo ya milenge, Mdabula Flying Squad, xi humelerile tanihi pulatifomo yo hlanganisa vatlangi lavatsongo ku suka emigangeni yo hambana hambana eka Malamulele na le kusuhi na kona. Xipano lexi, lexi simekiweke hi 2024, xi kongomisa ku hlanganisa xivandla exikarhi ka vatlangi va bolo ya milenge lava nga na vuswikoti ku suka emigangeni ya Mudavula, Mulamula, Gumbani, Mushwani, Dakari, Mavambe, na tindhawu tin’wana, loko xi ri karhi xi navela ku ndlandlamuka na ku kuma vatlangi ku suka eGiyani.

Vito ra xipano lexi ri hlohloteriwile hi xipano xa khale lexi khale a xi tirha ehansi ka vito leri fanaka, naswona a xi vumbiwe hi vatlangi vo tala vo huma eka Malamulele. Musunguri-kulobye Ntwanano Reggar Mathebula u hlamuserile leswaku: “A hi kumanga xipano lexi nga na vatlangi vo huma emigangeni leyi hinkwayo, kutani hi teke xiboho xo tumbuluxa Mdabula Flying Squad ku hlanganisa titalenta ta vantshwa.”

Ku sukela kwalaho, xipano lexi xi phikizana eka tithonamente ta laha kaya ematshan’wini ya tiligi. Mphikizano wa xona wo sungula wa ximfumo a ku ri thonamente ya Hilwa na Vusiwana, leyi a yi hleleriwe hi Tsunduka Makandeni naswona a yi teka ndhawu erivaleni ra mintlangu ra Mudavula hi ti 24 Nwendzamhala 2024.

Mdabula Flying Squad yi simekiwile hi vanhu va nkaye vo huma emugangeni wa Mudavula, naswona ku fikela namuntlha, swirho leswi nga simeka xipano lexi swa ha ri kona. Xipano xi kumile nseketelo ku suka eka vaseketeri vambirhi ku nga SHEQ International, leyi nyikeleke gere ya xipano, na Madoda Foundation.

Swa ha te tano, xipano lexi xi ta phikizana eka tithonamente timbirhi hi nkarhi wa Paseka. Xi ta tlanga eka thonamente ya Bolo ya Milenge ya Lembe na Lembe ya Mavalani leyi nga ta teka ndhawu ku sukela hi ti 18 ku fikela hi ti 21 ta Dzivamisoko. Kasi xi ta tlhela xi nghenelela eka thonamente yo sungula ya Bolo ya Milenge ya Mdavula emugangeni wa Mudavula leyi languseriweke kuva kona hi ti 18 na ti 19 ta Dzivamisoko. Hi masungulo yo tiya na nseketelo lowu kulaka, Mdabula Flying Squad yi le ndleleni leyinene yo va rivoni ro nkarhi eka vatlangi va bolo ya milenge lavatsongo endhawini ya Malamulele.