Shiluva A Hlohlotela Vantshwa na Ku amukela Ndhavuko hi buku
Exikarhi ka ximutana xa ka Xitlhelani, lexi tshamisekeke endzeni ka muganga wa ka Malamulele, ku tshama munhu wo hlamarisa loyi a vuriwaka Nxumalo Shiluva Consecial.
Shiluva u rhendzeriwile hi ntokoto lowu fuweke wa swiyenge swa ndhavuko, Naswona ku kurisiwa ka Shiluva ku n’wi vumbile leswaku a va munhu loyi a hlanganisiweke swinene na timitsu ta yena ta ndhavuko.
Manana wa yena i n’anga ya xintu, naswona rixaka leri katsaka vakokwana wa yena a va endla ntirho lowu fanaka, leswi endlaka leswaku vutomi bya Shiluva byi hlanganisiwa na xihundla xa vutlhari bya vakokwana wa yena.
Hi ku hlohloteriwa hi ntokoto wa yena n’wini na ku navela ku avelana vutivi bya yena na rixaka lerintshwa, Shiluva u sungurile ku tsala buku leyi a yi kongomiseke eka vantshwa. Eka buku leyi, u kongomisa ku voningela vuyelo bya swiendlo swa munhu na nkoka wo tshama u tshembekile eka ripfumelo ra wena.
Buku leyi, yi vulavula hi mintlhontlho leyi nsati wa vumbirhi a langutaneke na yona eka vukati bya ntshengo. Hi ku seketeriwa hi nuna wa yena, nsati wa vumbirhi u tikuma a nghene hi nhloko eka nxaxamelo wa swihinga (mintlhontlho) leswi tumbuluxiweke hi nsati wo sungula, loyi a navela ku tekiwa a ri yexe.
Shiluva u tshemba leswaku vayingiseri va yena va nga twisisa ku tiyisela ka nsati wa vumbirhi na ripfumelo leri nga tsekatsekiki loko a langutane na maxangu evukatini. U kandziyisa nkoka wa ku nga tshuki u lahlekeriwa hi ntshembo, hambi ku ri ku tshama u tiyile eka ripfumelo, hambiloko a langutane ni vubihi.
Eka buku leyi, Shiluva u kongomisa ku paluxa tlhelo ra munyama eka vanhu, a kombisa hilaha munhu a nga nghenaka hakona evunyameni hi swikongomelo swo biha, swo lava ku onha vutomi bya van’wana. Hi ku kandziyisa vuyelo bya swiendlo swo tano, u tshemba ku nghenisa ku titwa ka vuxiyaxiya eka vahlayi va buku leyi, hambi ku ri ku va khutaza leswaku vatirhisa maendlelo ya ndhavuko eka leswinene ku nga ri ku xanisa vanhu van’wana, leswaku u ta kota ku vuyeriwa.
Eka ku hundzuluka kun’wana loku nga languteriwangiki, ntiyiso wu humela erivaleni, leswi endlaka leswaku nsati wo sungula a hlongoriwa endyangwini. Ku cinca loku ka swiendlakalo a ku tiseli vululami eka nsati wa vumbirhi ntsena kambe ku tlhela ku n’wi nyika ku rhula loku a a tshamela ku wu khongelela.
Xikongomelo xa Mutsari Shiluva i ku kombisa leswaku, eku heteleleni, ntiyiso wu hetelela uva erivaleni, naswona lava va byalaka mbewu ya vubihi va hetelela va tshovela leswi va swi byaleke.
Eka rixaka ra namuntlha, laha vantshwa vo tala va tlhelaka va a nga rhela ndhavuko, no amukela ndzhaka ya vona ya ndhavuko, ntirho wa Shiluva wu tirha tanihi ntsheketo wa xitsundzuxo.
Naswona buku leyi, yi tlhela yi kombisa switandzhaku leswi nga vaka kona swa ku tirhisa maendlelo ya ndhavuko hi ndlela yo biha leswaku u ta vuyeriwa, hambi ku ri ku hlohlotela vantshwa ku tirhisa vutivi na mindhavuko ya vona ku antswisa vona na miganga ya vona.
Shiluva u vurile leswaku, “Ndzi lava leswaku vantshwa va twisisa matimba na nkoka wa mindhavuko ya hina. Hi ku avelana xitori lexi, ndzi tshemba ku va hlohlotela ku amukela ndzhaka ya vona no yi tirhisa tanihi rivoni ro kongomisa evuton’wini bya vona.”
” A hi dyondzeni eka swihoxo swa van’wana na ku lwela ku tumbuluxa vumundzuku byo antswa eka hina na lava hi hanyaka na vona,” ku engeta Shiluva.
Ku tinyiketela ka Nxumalo Shiluva Consecial ku hlayisa na ku avelana ndzhaka ya yena ya ndhavuko swa bumabumeriwa hakunene.Hi buku ya yena, a nga dyondzisi ntsena kambe u tlhela a hlohlotela vantshwa ku amukela mindhavuko ya vona no yi tirhisa tanihi matimba ya leswinene.
Ntirho wa yena wu tirha tanihi xitsundzuxo xa leswaku timitsu ta hina ti khome matimba lamakulu na vutlhari, ti rindzele ku tirhisiwa ku antswa ka vaaki.
