Meyara a burisa na vaaki eka wadi 28
Hi Ntsakisi Gracia Chauke
Hi ti 26 ta Nyenyenyani 2025, Meyara wa Masipala wa Muganga wa Collins Chabane, Cllr. Shadrack Maluleke u khomile nhlengeletano leyi vuriwaka Mayoral Imbizo emugangeni wa Magomani ku hlangana na vaaki va Wadi 28 na ku burisana hi swivilelo swa vona mayelana na mphakelo wa vukorhokeri. Ntirho lowu wu ngheneriwile hi Hosi Xikundu, varhangeri va Contrallesa, swirho swa komiti ya vulawuri, vakhanselara, na xipikara xa masipala Cllr. Thina Mbedzi. Kasi xikongomelo xa Imbizo a ku ri ku antswisa vuhlanganisi exikarhi ka masipala na vaaki, ku tiyisisa leswaku timhaka ta ndhawu ti langutisiwa hi ku kongoma.
Eka mbulavulo wa yena, meyara u kombisile migingiriko yo hlaya leyi kongomisiweke eka ku antswisa vutomi bya vaaki va Collins Chabane, ngopfungopfu eka ku tumbuluxiwa ka mitirho na nhluvukiso wa vaaki. “Hi laha namuntlha ku ta mi yingisela, naswona swin’we, hi ta kuma swintshuxo eka mintlhontlho leyi mi langutaneke na yona. Xikongomelo xa hina i ku antswisa mphakelo wa vukorhokeri na ku tumbuluxa swivandlanene,” ku vula meyara, a kandziyisa ku tinyiketela ka masipala ku lulamisa swivilelo swa vaaki.
Xiendlakalo lexi xi tlhele xi nyika vaaki nkarhi wo humesa swivilelo swa vona. Meyara u yingiserile hi vukheta timhaka leti tlakusiweke hi vaaki, a tshembisa leswaku swin’wana swa swivilelo swi ta landzeriwa hi xihatla. U tiyisisile vaaki leswaku swibumabumelo swa vona i swa nkoka naswona swi ta pfuneta ku kongomisa tipulani ta nkarhi lowu taka ta masipala. “Swivilelo swa n’wina hi swi teka swi ri swa nkoka, naswona hi ta tirha hi matimba ku kuma swintshuxo,” ku engetela Maluleke.
Imbizo yi gimetile hi ku nyikela Muchini wo Endla Botere ya Timanga na Muchini wo gaya Mavele eka vaaki va Wadi 28. Michini leyi i xiphemu xa matshalatshala yo anama ya masipala yo seketela mabindzu ya laha kaya na ku tumbuluxa swivandlanene swa ikhonomi. Meyara u hlohlotele vaaki ku tirhisa switirhisiwa leswi ku antswisa vutomi bya vona na ku hoxa xandla eka nhluvukiso wa ndhawu.
Endzhaku ko amukela michini leyi, Hosi Xikundu u komberile vaaki ku hlayisa switirhisiwa leswi kahle. “Michini leyi yi ta hi vuyerisa hinkwerhu, kambe hi fanele ku yi sirhelela. Ndzi mi kombela leswaku mi nga yi yivi, tanihi leswi yi nga laha ku pfuna vaaki hinkwavo,” Hosi Xikundu u vurile, a tshikelela nkoka wa vutihlamuleri byo hlanganela eku tiyisiseni leswaku michini yi tirhela xikongomelo xa yona lexi yi kunguhatiweke.
