Ku Tengiwa ka Nandzu wo Dlaya “Big Moss” Wu sungula
POLOKWANE – Ku tengiwa ka nandzu wa vavanuna va tsevu lava hehliwaka hi ku dlaya Moses Maluleke, meyara wa masipala wa Collins Chabane, wu sungurile namuntlha ekhoto ya le henhla ya Polokwane,exifundzenikulu xa Limpopo.
Vaehleketeleriwa va langutane na swihehlo swo endla xikungu xo dlaya, ku phanga, ku dlaya, ku ringeta ku dlaya na ku va na xibamu lexi nga riki nawini.
Vavanuna lava va tsevu, lava tivekaka tani hi Avhatakali Mulaudzi, Shumani Nemadodzi, Avhatakali Isaac Mudau, Wiseman Baloyi, Tshianeo Munyai, na Pfunzo Lidzebe, ku hehliwa leswaku va dlaye meyara ekaya ra yena, naswona mhango leyi yi rhumele magandlati yo chavisa emugangeni hinkwawo naswona yi pfuxe ku hlundzuka lokukulu.
Nandzu lowu wu languteriwile swinene, hi vateki va mahungu hambi kuri vaaki va le hansi ka masipala wa Collins Chababe. Vamangaleriwa va ta boheka ku hlamula eka swihehlo leswikulu leswi va hehliwaka hiswona,naswona va ta langutana na matimba ya nawu.
Ku dlayiwa ka vatirhela mfumo va masipala i mukhuva lowu karhataka eAfrika-Dzonga, tanihi leswi swi onhaka vuhlayiseki na ku tshamiseka ka mfumo wa miganga.
Maluleke u duvuriwile no dlayiwa ekaya rakwe emugangeni wa ka Xikundu hi Mawuwani 2022 hi nkarhi lowu ku hehliwaka leswaku vaehleketeriwa a va ri ku phangeni.
N’wana wa yena wa mufana wa 18 wa malembe hi vukhale na yena u duvuriwile, kambe u kumini vutshunguri exibedlhele.
