Mphikizano wa Minister of Health wu humelela ka Matiyani Village
MATIYANI – Mphikizano wa bolo ya milenge wa Minister of Health Tournament lo wu wunga ku yeni emahlweni eka rivala ra mintlangu ka Matiyani, hi xikongomelo xo dyondzisa vanhu hi nkoka wa rihanyo na vuhlayiseki wu languteriwile ku fika emakumu mahelo ya vhiki lawa. Mphikizano lowu a wu ngineriwile hi swipano swo hlaya, ku katsa na xipano xa Vakhengula va ndhawu liya, xikan’we na swipano swa vavanuna na vavasati.
Mphikizano lowu wu humelerile swinene, laha mintshungu leyikulu yi humeke ku ta hlalela mintlangu ni ku dyondza swo tala hi rihanyo ni vuhlayiseki. Handle ka mintlangu ya bolo ya milenge, a ku tlhela ku va ni mintirho yo hambana-hambana ya dyondzo, leyi endleriweke ku tivisa vanhu hi swa rihanyo, ku endla vutiolori ni tinhloko-mhaka tin’wana ta nkoka ta rihanyo.
Rin’wana ra marungula ya nkoka ya mphikizano lowu a ku ri nkoka wa ku endla vutiolori nkarhi na nkarhi. Bolo ya milenge i ndlela ya kahle swinene yo endla leswaku vanhu va tshama va ri karhi va gingiriteka naswona va hanye kahle,mphikizano lowu wu nyikile nkarhi lowunene eka vanhu ku kota ku endla vutiolori.
Hambiswiritano ntlangu wa bolo wa vavanuna wu fikile emakumu ka siku Ravumune 25 Mudyaxihi 2023 lani xipano xa Josefa Cosmos xi nga fayetela xipano xa Shumba leswaku xiva ngwazi ya mphikizano. Kasi mphikizano wu languteriwile ku gimetiwa xifumo mahelo ya vhiki lawa.
Hi ku angarhela, mphikizano wa bolo ya milenge wa Minister of Health top 8, wu humelerile swinene, wu pfunetile swinene ka ku lemukisa hi nkoka wa rihanyo na vuhlayiseki hi ndlela yo tsakisa. Hambi kuri ku hlanganisa swipano swo hambana na miganga, mphikizano wu tlhele wu pfuneta ku tlakusa vun’we na ku hlangana ka vaaki, ku tiyisisa mianakanyo ya leswaku rihanyo lerinene i nchumu lowu faneleke ku averiwa no tlangeriwa hi un’wana na un’wana.
