MEC A Kombela Vatswari Ku teka Magoza eka Swikoweto swa Mfukuzana ya Vana
Tanihi leswi hi nga ka n’hweti yo Lemukisa hi vuvabyi bya mfukuzana eka Vana, MEC wa Rihanyo eLimpopo Dokodela Phophi Ramathuba u rhumela hungu ra nkoka eka vatswari laha a nga vula leswaku “ Loko vana va n’wina va kombisa swikoweto swa mavabyi kumbe ku pandza hi nhloko loku phikelelaka, i swa nkoka leswaku mi teka magoza ma rihanyo ka hari na karhi”.
MEC u tlhela a vula leswaku, Swikombiso leswi swa mfukuzana, mi nga switekela ehansi loko swa ha sungula, kambe tivani leswaku swi nghozi swinene tanihi leswi swi nga vangaku ‘brain tumor’.
Hi Ravumbirhi, MEC Dkd Ramathuba u rhangele pfhumba ro lemukisa hi vuvabyi bya mfukuzana ya vana exikolweni xa le hansi xa Newlook ePolokwane.
“vatswari va fanele ku papalata ku ringeta ku tshungula vana va vona ekaya naswona ematshan’wini ya sweswo va fanele va hatlisa va lava mpfuneto wa xiphurofexinali eka ndhawu ya nhlayiso wa rihanyo ya le kusuhi ku kuma vukamberi lebyi faneleke,” ku vula MEC wa Rihanyo eLimpopo Dikodela Phophi Ramathuba.
MEC u tshikelerile mhaka ya nkoka swinene a vula leswaku “ Mfukuzana yi nga tshunguleka kambe loko vaongori va hatla va yi kuma ka ha ri na nkarhi.”
“Kambe loko vaongori vohlwela ku yi kuma emirini wa munhu swi nga endla leswaku yi nga ha tshungeleki, naswona swi nga endla leswaku hi lahlekeriwa hi vutomi bya risima,” ku vula MEC wa Rihanyo eLimpopo Phophi Ramathuba.
Loko vatirhela-mfumo va rihanyo vo fana na Dokodela Ramathuba va ri karhi va endla matshalatshala yo lemukisa na ku nghenelela eka mabulo mayelana na mfukuzana ya vana, vava va ri na xikongomelo naswona xikongomelo xa vona a hi ku tekela Vatswari ehansi.
Naswona Vatswari vafanele vaswitiva leswaku matshalatshala lawa ya endliwaka hi ndzawulo ya rihanyo i magoza ya nkoka enyimpini leyi yaka emahlweni yo lwisana ni mfukuzana.
“Hi fanele ku tirhisana ku tiyisisa leswaku n’wana un’wana na un’wana u na nkarhi wo lwisana na vuvabyi bya mfukuzana. Magoza ma xihatlha na ku lemukisa swi nga endla ku hambana hinkwako eku poniseni ka vutomi bya vana.” Ku gimeta MEC Ramathuba.
Vanhu hinkwerhu va fanele ku teka magoza ya xihatlha eka swa rihanyo swa vana va hina, hikuva loko mfukuzana yo kumiwa ka ha ri na nkarhi hakunene swa olova ku ponisa vutomi bya vona.
