Ti nyiketeleni, ku vula MEC wa Dyondzo
Hi Ntsakisi Gracia Chauke
Loko ku sale masiku ma nga ri mangani ntsena ku sungula swikambelo swa makumu swa matiriki swa 2024, MEC wa Dyondzo wa xifundzhankulu xa Limpopo, Mavhungu Lerule-Ramakhanya, u vulavule na vadyondzi eSinthumule, eka ntirho lowu a wu khomeriwe eKerekeni ya True Worship Christian Church ehansi ka Xifundzha xa Dyondzo xa Vhembe West.
Ntirho lowu, lowu khomiweke hi ti 12 Hlangula, a ku ri xiphemu xa kungu ra ndzawulo ya dyondzo ya Xifundzankulu ra ‘Matric Last Push’ leri kongomisiweke eka ku hlohlotela vadyondzi hi nkarhi wa vona wo hetelela.
MEC u khutazile vadyondzi ku tiyimisela, va tirha hi matimba, na ku pfumela eka vuswikoti bya vona loko va ri karhi va tilulamisela swikambelo leswi nga ta vumba vumundzuku bya vona.
“Loko hi ri karhi hi hlayela masiku yo hetelela ku ya eka swikambelo swa n’wina, ndzi mi khutaza leswaku mi ti nyiketela naswona mi tirha hi ku hiseka. Ti tshembeni hikuva mi na matimba yo vumba vumundzuku bya n’wina,” ku vula MEC Lerule-Ramakhanya.
Kungu ra ‘Matric Last Push’ i matshalatshala ya ntirhisano ku suka eka Ndzawulo ya Dyondzo, vadyondzisi, na vakhomaxiave van’wana ku nyika nseketelo lowu kongomisiweke, ku tlakusa ku ti tshemba ka vadyondzi, na ku tiyisisa leswaku va lunghekele swikambelo swa vona.
MEC Lerule-Ramakhanya u tiyisisile vadyondzi leswaku Ndzawulo yi ti nyiketerile ku nyika dyondzo ya xiyimo xa le henhla na switirhisiwa leswi lavekaka ku humelela. “Ha ti nyungubyisa hi vadyondzi na vadyondzisi va hina. Hi ri swin’we, hi ta fikelela mimbuyelo yo hlamarisa,” a gimeta.
