Timhangu Ta Kholera Ti Tiyisisiwa eLimpopo
Ndzawulo ya Rihanyo eLimpopo yi vikile timhangu timbirhi letintshwa ta kholera exifundzhenikulu lexi. Vavabyi lava havambirhi, va malembe ya 43 na 27, i vavanuna vo huma etikweni akelani ra Zimbabwe.
Kuya hi swiviko swa ndzawulo vavanuna lava, a va kombisa swikoveto (symptoms ) swa kholera loko va vuya eka nguva ya nkhuvo.
Neil Shikwambana, muvulavuleri wa ndzawulo ya rihanyo eLimpopo, u boxe leswaku vanhu lava va hatlisile va amukeriwile eswibedlhele swa Musina na Hellen Franz kutani va kamberiwa.
Swikoveto swa kholera hi ntolovelo swi katsa ku pfimba lokukulu, ku hlanta ni ku pfumaleka ka mati emirini.
Shikwambana u kandziyisile nkoka wa ku kuma vutshunguri loko wa ha ku khomiwa hi xitsongwatsongwana lexi, a kombisa leswaku loko kholera yi nga tshunguriwi, yi nga vanga swiphiqo leswikulu hambi ku ri rifu.
“Eka ku ehleketeleriwa ka xitsongwatsongwana lexi, magoza ya xihatla ya tekiwile ku tiyisisa ku amukeriwa na vutshunguri eka vavabyi lava,” ku vula Shikwambana.
Ndzawulo ya rihanyo yi hlohlotela vanhu leswaku va xalamuka na ku kahlula va teka magoza ya xihatla ku sivela ku hangalaka ka kholera eka xifundzha lexi.
“Lava vukorhokeri bya vutshunguri loko u va na swikoveto swihi na swihi leswi fambelanaka na kholera,” ku engetela Shikwambana.
