Ku Susiwa Xirhumbana ku tisa ntsako eka Nhwanyana eLimpopo
Ndzawulo ya Rihanyo eLimpopo yi le mahungu ngopfu hi ku humelela ka vuhandzuri bya yona eka munhu wa xinsati wa Malembe ya 22 hi vukhale loyi a ri na thumba [Xirhumbana] eka rama ra xinene.
Thumba leri hi tlhelo ra vutshunguri ri tiveka tanihi plexiform neurofibromatosis, a ri vanga ku karhateka lokukulu ni ku endla leswaku wanhwana loyi a nga vi na ku tsaka. Hikwalaho ka madokodela ya vuhandzuri lama nga na vutshila na vatirhi va rihanyo lava tinyiketeleke, thumba leri ri susiwile hi ndlela leyi humelelaka hi siku ra vu 7 ra N’wendzamhala 2023.
Kuvikiwa leswaku Muvabyi loyi u kuma vutshunguri naswona u le ku holeni kahle eka wadi ya yena, leswi tisaka ntshembo eka yena na varhandziwa va yena. Muvulavuleri wa ndzawulo ya rihanyo eLimpopo, Neil Shikwambane, u kombisile ku eneriseka ka ndzawulo hi mbuyelo lowu, a vula leswaku, “Thumba ri tsemiwile hi ndlela leyi humelelaka, naswona muvabyi wa hina u hola kahle eka wadi ya yena.”
Mahungu lawa ya tisa ku ntshunxeka na ntsako eka vaaki, tanihileswi va vonaka vuyelo lebyinene bya vukorhokeri bya rihanyo bya xiyimo xa le henhla. MEC Dr Phophi Ramathuba, u tlangile xiave xa nkoka eku tiyisiseni ka vuhlayiseki bya nhwanyana loyi.
MEC Ramathuba u n’wi nyikile swiluva swo saseka, leswi yimelaka ku hluka ka ndzima leyintshwa evuton’wini bya yena. Loko a anakanyisisa hi xiendlo lexi xo tsakisa, MEC Ramathuba u kombisile ku khensa ka yena eka madokodela ya vuhandzuri na vatirhi va rihanyo lava katsekaka eka endlelo leri humeleleke.
“Mhaka leyi yo tsakisa yi tirha tanihi xitsundzuxo xa nkucetelo lowukulu lowu nhlayiso wa rihanyo wa ntwela-vusiwana wu nga vaka na wona evuton’wini bya vanhu. Ku susiwa ka thumba loku humelelaka a ku tiseli ku ntshunxeka emirini ntsena eka muvabyi kambe ku tlhela ku vuyisela ku titshemba ka yena ni ku titwa a sasekile,” ku vula MEC Dr Ramathuba.
MEC u ngimetile hi ku vula leswaku, “I vumbhoni bya matimba ya vutshunguri bya manguva lawa na ku tinyiketela loku nga tsekatsekiki ka vatirhi va rihanyo ku antswisa vutomi bya vavabyi va vona.”