Maphorisa ya nsimeka mpfhumba ro hlotana na ntlawa wa swingevenga
SEKHUKHUNE – Maphorisa eLimpopo ya sungurile ku lavisisa ntlawa wa vanhu mayelana na ku phanga ka mali, mhangu yi humelelini egondzweni lerikulu ra Senotlelo-Mokgwaneng eMatlelerekeng eXifundzheni tsongo xa Sekhukhune hi ti 29 ta Mudyaxihi 2023.
Kuya hi muvulavuleri wa maphorisa e Limpopo, Colonel Ledwaba Malesela, Movha wo rhwala Mali a wu famba hi patu ra Senotlelo-Mokgwaneng loko wu tahlaseriwa hi ntlawa wa kwalomu ka khume ra vaehleketeleriwa lava a va chayela movha wa VW Jetta 5 na double cab bakkie.
Loko muvulavuleli Malesela a ya emahlweni u vurile leswaku Vaehleketeleriwa lava a va hlomile swinene.
“Ku hehliwa leswaku vaehleketeleriwa va sindzisile varindzi va Mali leswaku va huma emovheni, naswona swingevenga leswi switlherile swi va tekela swibamu swa vona,” ku vula Kolonele Ledwaba Malesela.
“Vaehleketeleriwa va byarile swibalesa eka movha wa mali naswona va teke mali leyi nga boxiwangiki va baleka,
Loko Malesela a ya emahlweni u vurile leswaku “Khombo ra kona, un’wana wa swirho swa ntlawa lowu u baleseriwini a vaviseka hi xibalesa lexi nga duvuriwa hi xigevenga kulobye naswona u pfuniwile hi van’wana loko va nga se baleka,”
Kolonele Ledwaba Malesela u tlherile a vula leswaku, Ku hava murindzi wa Mali loyi a nga vaviseka eka mhangu leyi
Kasi Lieutenant General Hadebe u komberile vaaki ku ya vika eMaphoriseni loko vari na vuxokoxoko bya leswaku swingevenga leswi swingava swiri kwihi.
“Vaaki va fanele ku hi pfuna hi rungula ra nkoka ku pfuneta eku khomiweni ka swingevenga leswi hi xihatla, “ku gimete Lieutenant General Hadebe.
