Ku vikiwa mhangu yo sungula ya Cholera eLimpopo
MUSINA – Ndzawulo ya rihanyo eLimpopo yi tiyisisile mhangu yo sungula ya kholera eMusina, doroba leri nga exifundzheni tsongo xa Vhembe. Kuya hi swiviko, muaka tiko wa Zimbabwe wa malembe ya 26 hi vukhale u amukeriwile exibendlhele xa Musina hi siku ra vu 26 ra nhweti ya Mudyaxihi 2023.
Kuya hi muvulavuleri wa ndzawulo ya Rihanyo Neil Shikwambana, muvabyi u amukeriwile, Naswona a hambanisiwile na vavabyi van’wana. Loko Shikwambana a ya emahlweni u vurile leswaku ” muvabyi loyi u kumile vutshunguri, Naswona hi tlherile hi rhumela ti-specimens eka NICD ku ya kamberiwa”.
“Mbuyelo wa swikambelo wu vuyile wu kombisa leswaku muvabyi loyi u na kholera, kambe ka karhi wa sweswi u ntshuxiwile exibendlhele tanihi leswi a lulameke,” ku vula Muvulavuleri Shikwambana.
MEC wa Rihanyo eLimpopo, Dokodela Ramathuba, u komberile vaaki ku tshama va rhulile no xalamuka hi ku titoloveta vuhlayiseki bya masungulo, byo fana na ku hlamba mavoko na ku nwa mati yo tenga.
“I swa nkoka ku tlhela hi tiyisisa leswaku mati lawa hi ya nwanaka ya tengile, Kasi loko ku ri mati yo huma ka swihlovo kumbe mo ka manga tengani mi fanele ku ma virisa ku ringana minete yin’we mi nga se ma nwa,” ku vula MEC Ramathuba.
Dokodela Ramathuba u ta endzela masipala wa muganga wa Musina namuntlha ku kambela xiyimo na ku nyika nseketelo lowu lavekaka eka Vaaki.
Kholera i vuvabyi lebyi tlulelaka swinene bya tibakteriya lebyi vangiwaka hi ku dya swakudya kumbe mati lama thyakeke. Swikombiso swa kona swi katsa ku hlanta, ku pfimba ka khwiri ni ku heleriwa hi mati emirini, leswi nga vangaka rifu loko swi nga tshunguriwi hiku copeta ka tihlo.
I swa nkoka leswaku vaaki va teka magoza yo sivela ku papalata ku hangalaka ka vuvabyi lebyi.
Vaaki va hlohloteriwa ku tirhisana na vatirhela mfumo va rihanyo na ku vika timhangu tihi na tihi leti ehleketeleriwa ku va ta kholera eka ndhawu ya rihanyo ya le kusuhi.
