2 va lova kasi vo hlaya va vaviseka eka “Mass Shooting” ka Muchipisi
MUCHIPISI – Maphorisa ya ka Malamulele ya karhi no lavisisa mhangu yo chavisa leyi nga humelela endhawini yo nwa byalwa eka Muchipisi, ehandle ka Malamulele, hi vusiku bya siku ro sungula ra Khotavuxika (1 June 2023).
Kuya hi swiviko swa maphorisa, mhangu leyi yi koxile vutomi bya vanhu vambirhi, naswona yi siye van’wana vo tlula ntlhanu va vavisekile.
Muvulavuleri wa maphorisa ya le ma Malamulele Colonel Khuzwayo u tiyisisile leswaku xivangelo xa ku duvula a xi se tiveka, naswona a ku se khomiwa vaehleketeleriwa ka karhi wa sweswi.
“Vulavisisi bya ha ya emahlweni, naswona Maphorisa ya endla xikombelo eka mani na mani loyi a nga na vuxokoxoko mayelana na mhangu leyi leswaku a ti hlanganisa na Maphorisa ya le kusuhi kupfuneta eka vulavisisi,” ku vula Muvulavuleri Khuzwayo.
Swirho swa vaaki swa hari na ku chava mixo lowu. Kasi van’wana va vula leswaku a kuri na mpfilumpfilu na ku chava loko vanhu va ringeta ku baleka eka xihangu xa matlulu.
Un’wana wa Vaaki u vurile leswaku munhu wun’we wu le xibendlhele naswona u le ka xiyimo xo chavisa swine e.
Maphorisa ya ka Malamulele, va tiyisisile leswaku va endla hinkwaswo leswi nga ematimbeni ya vona ku khoma vaendli va mhangu leyi leswaku va ta teka vutihlamuleri ehubyeni.
Mhangu leyi yi rhumele magandlati yo chavisa eka vaaki hinkwavo, laha vo tala va kombiseke ku hlundzuka na ku vilela hi vuhlayiseki bya vona
Colonel khuzwayo uyile emahlweni a vula leswaku maphorisa va tshembisa vaaki leswaku va le ku engeteleni ka matshalatshala ya vona ku tiyisisa vuhlayiseki bya vaaki na ku sivela timhangu to fana na leti eka nkarhi lowu taka.
