Wansati wa le Giyani U Dlayiwile eka Nhlaselo wa Madzolonga ya Rimbewu
GIYANI – Eka Mhangu leyi tsemaka mbilu emugangeni wa ka Nwakhuwani, Giyani, nhlaselo wa tihanyi wa madzolonga wu teke vutomi bya Esther Michavi wa malembe ya 43 hi vukhale. Mhangu leyi, leyi humelerile hi kwalomu ka awara ya 00:30 hi Ravunharhu.
Swiviko swipaluxa leswaku Ester U tlhaveteriwile ko hlaya loko a nga se hundza emisaveni hi wanuna loyi ku ehleketeleriwaka leswaku i muhlekisani wa yena naswona Wanuna loyi a ringeteke ku nghenelela leswaku a lamula na yena u tlhaveteriwile eka nhlaselo lowu.
Kuvikiwa leswaku Mhangu leyi humelerile endlwini leyi ya ha akiwaka, laha Esther na vana va yena va mune va lave vutumbelo eka munghana wa yena hikwalaho ka mintlhontlho eka vuxaka bya yena na mumangaleriwa. Kuya hi Muvulavuleri wa Maphorisa eLimpopo Brigadier Hlulani Mashaba, Muehleketeleriwa, hiku tirhisa rivanti leri siyiweke ri nga lotleriwanga, u kumile mfikelelo endlwini kutani a sungula ku nhlasela Esther hi ndlela yo chavisa.
“Hambi leswi n’wini wa ndhawu a ringeteke hi xivindzi ku yimisa nhlaselo lowu, muhlaseri u hundzuluxele madzolonga ya yena eka wansati loyi a nga si baleka a ya lava mpfuneto eka vaakelani,” ku vula Muvulavuleri wa SAPS Hlulani Mashaba.
“Munhu wa xivindzi u ringetile ku ponisa muhlaseriwa Esther kambe na yena u tlhaveteriwile hi muehleketeleriwa lani a nga vaviseka swinene, naswona Muehleketeleriwa u balekile endzhaku ka sweswo,” ku engetela Mashaba.
Vatirhi va xilamulele mhangu va tiyisisile ku hundza emisaveni ka Esther endhawini ya mhangu loko wanuna loyi a vavisekeke a nga tsutsumelerisiwa endhawini ya vutshunguri bya le kusuhi.
Loko a kombisa ku chava na ku vilela hi mhangu leyi, Khomixinara wa xifundzhakulu xa Limpopo, Lieutenant General Thembi Hadebe, u bumabumerile vutlhari lebyi kombisiweke hi wanuna loyi a ringeteke ku ponisa Esther eka muhlaseri.
Khomixinara u tlhele a kombisa nkucetelo wo vava lowu xiendlo lexi xa madzolonga lexi xi nga ta va na wona eka vana va Muhlaseriwa Esther. “Xiendlakalo lexi xi khomisa gome swinene, xi siya swilondza leswikulu swa mintlhaveko, ngopfu ngopfu eka vana va Esther,” ku vula Lieutenant General Thembi Hadebe.
“Nhlaselo wo tano wa tihanyi i ku tlhelela endzhaku eka hina, ngopfungopfu hi nkarhi wa pfhumba leri yaka emahlweni ra Masiku ya 16 yo lwisana na Madzolonga eka Vavasati na Vana.” Ku engeteriwile General Thembi Hadebe.
Loko vulavisisi byi ri karhi byi ya emahlweni, Maphorisa va pfule nandzu wa ku dlaya ni ku ringeta ku dlaya.
