N’wana Wa Nhwanyana U Khomiwile Hi Swihehlo Swo Dlaya
Eka ku cinca loku chavisaka, muganga wo rhula wa Rooerfontein ehandle ka Giyani exifundzheniTsongo xa Mopani wu tsekatsekisiwile hi mhangu yo vava hi Ravunharhu na vusiku. Maphorisa ya ndzhawu liya ya khomile muehleketeleriwa wa xisati wa khume Kaye wa malembe hi vukhale mayelana na swihehlo swo dlaya tatana wa yena n’wini.
Kuya hi Muvulavuleri wa Maphorisa eLimpopo Brigadier Hlulani Mashaba, maphorisa ya amukerile riqingho hi Ravunharhu nimadyambu, leri va lemukisa hi mpfilumpfilu emugangeni wa Roerfontein.
“Loko va fika laha mhangu yi nga humelela kona, va kume ntsumbu wa wanuna wa 60 wa malembe hi vukhale, loyi a tivekaka tani hi Edward Frank Ralekgokgo, a ri na swilondza swo tlhaviwa enhlaneni na voko ra xinene,” ku vula Muvulavuleri wa Maphorisa Mashaba.
Mashaba u ya emahlweni a vula leswaku, Endzhaku ku paluxiwile leswaku nsati wa muhlaseriwa u vone ku holova loku.
“Vuxokoxoko bya mhangu leyi a byise va erivaleni hi xintalo, kambe ku tshembiwa leswaku mufi u nghenelerile eka njhekanjhekisano lowukulu na nsati wa yena,
“Hi ku vona ku karhateka ka manana wakwe, n’wana wa nhwanyana u nghenelerile kutani a vitana mpfuno eka vaaki,
“Lexi khomisaka gome, xiyimo xi nyanyile loko tatana a hlasele n’wana wakwe wa nhwanyana hi xitlhavana . Hi xiendlo xo tisirhelela, nhwanyana loyi u swi kotile ku teka xitlhavana lexi eka tatana wa yena naswona a nwi tlhava,,” ku engetela Muvulavuleri wa Maphorisa.
“Vaongori va xilamulela-mhangu va fikile endhawini ya mhangu kambe a va swi kotanga ku ponisa vutomi bya Ralekgokgo, va n’wi tivisa leswaku u loverile endhawini ya mhangu,” ku engeterile yena.
Nsusumeto wa mhangu leyi yo tsema mbilu a wu tiveki, kambe madzolonga ya le mindyangwini ya tekiwa tanihi xivangelo lexi nga vaka kona, leswi swi vula hi Muvulavuleri wa maphorisa.
Vaaki va Rooerfontein va sala va ri karhi va lwisana na ku chava na gome loko va ringeta ku twisisa swiendlakalo leswi humeleleke exikarhi ka vona.
Xiendlakalo lexi xi tirha tanihi xitsundzuxo lexikulu xa vuyelo byo biha bya madzolonga ya le mindyangwini na xilaveko xa xihatla xa ku nghenelela na nseketelo eka mindyangu leyi khumbekaka.
Muehleketeleriwa loyi, i wa xisati wa khume kaye wa malembe hi vukhale, sweswi u le khotsweni ra maphorisa naswona u languteriwa ku ya emahlweni ka khoto ya majistarata ya Giyani hi Ravuntlhanu, December 1, 2023.
Maendlelo ya khoto ya ta voningela swinene swiyimo leswi rhendzeleke mhangu leyi yo vava.
