Wanuna wa 35 wa malembe a dlayiwa eCollins Chabane Municipality
Eka mhangu yo vava leyi nga humelela hi Sonto, 26 Hukuri 2023, wanuna wa 35 wa malembe hi vukhale u lahlekeriwe hi vutomi bya yena endzhaku ko tlhaviwa hi muehleketeleriwa wa khume kaye (19) wa malembe hi vukhale emugangeni wa le Phugwani.
Muehleketeleriwa u khomiwile hi Maphorisa ya ka Malamulele endzhaku ka loko ndyangu wa yena wu n’wi nyiketile emaphoriseni.
Kuya hi swiviko, muhlaseriwa, Fistos Mabasa, a ri karhi a tiphina hi swakunwa na ntlawa wa vanhu, ku katsa na muehleketeleriwa, loko mhangu leyi yi humelela.
Ku hehliwa leswaku muehleketeleriwa u landzerile Mabasa loko a ya exihambukelweni kutani a n’wi hlasela hi nchumu wo kariha, leswi nga endla leswaku Mabasa a lahlekeriwa hi Vutomi bya yena.
Maphorisa na Va xilamulele mhangu va tsutsumele endhawini ya mhangu, Kambe loko va fika, muehleketeleriwa se a a balekile. Lexi twisaka ku vava, Mabasa u vuriwile leswaku u hundzile emisaveni endhawini ya mhangu.
Goza ra xihatla ra ndyangu wa muehleketeleriwa ro n’wi nyiketa eka Maphorisa ra bumabumeriwa. Swi kombisa nkoka wa ku nghenelela ka vaaki eku lwisaneni na vungevenga.
Muehleketeleriwa sweswi u le khotsweni naswona u languteriwile ku ya emahlweni ka khoto ya majistarata ya Malamulele hi Ravumbirhi, 28 Hukuri 2023.
Maphorisa ya ya emahlweni na matshalatshala ya wona yo hlengeleta vumbhoni na ku kumisisa nsusumeto wa xiendlo lexi xa madzolonga lexi nga riki na xikongomelo.
